सातारा : मोबाईलवर आलेली लिंक ओपन केल्यानंतर आठ लाखांहून अधिकची रक्कम बँक खात्यातून गायब झाली. हा प्रकार समोर आल्यानंतर जावलीच्या गटशिक्षणाधिकार्‍यांनी सातारा शहर पोलीस ठाण्यात तक्रार दिली. पोलिसांनी अज्ञातांविरोधात फसवणुकीचा गुन्हा नोंद करुन आरोपींचा शोध सुरू केला आहे.
याबाबत पोलिसांत दिलेल्या फिर्यादीनुसार, याप्रकरणी गट शिक्षणाधिकारी संजय श्रीरंग धुमाळ (रा. गोडोली सातारा) यांनी तक्रार दिलेली आहे. त्यानुसार दि. 7 ते 13 मे या दरम्यान फसवणुकीचा हा प्रकार झालेला आहे. मोबाईलवर आलेली लिंक ओपन करुन त्यामध्ये माहिती भरण्यात आली होती. त्यानंतर बँक खात्यावरुन पैसे जाऊ लागले. यामध्ये एकूण 8 लाख 10 हजार 266 रुपये काढण्यात आले. ही बाब लक्षात आल्यानंतर संजय धुमाळ यांनी तत्काळ पोलिस ठाण्यात धाव घेतली. त्यानंतर तक्रार दाखल करण्यात आली. सातारा शहर पोलिसांनी गुन्हा नोंद केला आहे. पोलिस उपनिरीक्षक अनिल जायपात्रे हे तपास करीत आहेत.
दरम्यान, पोलिसांनी यामध्ये चार आरोपी निष्पन्न केले आहेत. हे इतर राज्यातील आहेत. यामधील सुमारे दीड लाख रुपयांची रक्कम होल्ड ठेवण्यात आलेली आहे, अशी माहितीही पोलिसांनी दिली आहे.