सातारा : सातारा तालुक्यातील शेंद्रे येथे महामार्गाच्याकडेला अंधारात उभ्या असलेल्या ट्रकला पाठीमागून कारने जोरदार धडक दिली. घटनेनंतर अज्ञात ट्रकचालकाने लगेच पलायन केले. या अपघातात कारमधील एका वृद्धाचा जागीच मृत्यू झाला, तर पाचजण गंभीर जखमी झाले. अपघातस्थळावरील खड्डा चुकवत असताना हा अपघात मंगळवार, दि. १ रोजी पहाटे साडेचार वाजता झाला. 

विठ्ठल गोविंद तारळेकर (वय ७६, रा. झुलेलाल चौक, सांगली) असे अपघातात ठार झालेल्या वृद्धाचे नाव आहे. याबाबत सातारा तालुका पोलीस ठाण्यात अज्ञात ट्रकचालकावर गुन्हा नोंद करण्यात आला आहे.

याबाबत घटनास्थळ व पोलिसांनी दिलेल्या माहितीनुसार या अपघातात पुजा नितीन तारळेकर (वय ३०), त्यांचा मुलगा देवांश नितीन तारळेकर (वय अडीच वर्ष), नितीन विठ्ठल तारळेकर (वय ३६, सर्व रा. झुलेलाल चौक, सांगली), राजेश्वरी महेंद्र लोकरे (वय १६), विरधवल महेंद्र लोकरे (रा. निवळी, ता. चिपळूण, जि. रत्नागिरी) अशी जखमींची नावे आहेत. हे सर्वजण सांगली येथून कारने (एमएच १० बीएम ४२४८) पुण्यातील नातेवाईकाच्या अंत्यविधीला निघाले होते. यावेळी नितीन तारळेकर हा कार चालवित होता. शेंद्रे, ता. सातारा गावच्या हद्दीतील राजस्थान ढाब्यासमोर आल्यानंतर तेथील खड्डा चुकवताना महामार्गाच्याकडेला अंधारात उभ्या असलेल्या ट्रकला त्यांच्या कारची पाठीमागून जोरदार धडक बसली. या घटनेनंतर अज्ञात ट्रकचालक हा अपघातस्थळावरुन तत्काळ पुढे निघून गेला. यामध्ये कारच्या पुढच्या सीटवर बसलेली पुजा तारळेकर त्यांचा मुलगा देवांश यांच्या डोक्याला गंभीर जखम झाली. तर कारमध्ये पाठीमागे बसलेली राजेश्वरी, विरधवल आणि विठ्ठल तारळेकर यांच्याही डोक्याला, हातापायाला गंभीर जखम झाली. जखमींना तातडीने जिल्हा शासकीय रुग्णालयात दाखल करण्यात आले. मात्र, विठ्ठल तारळेकर यांचा उपचारापूर्वीच मृत्यू झाला. सर्व जखमींवर सिव्हिलमध्ये प्राथमिक उपचार केल्यानंतर त्यांना साताऱ्यातील एका खासगी दवाखान्यात उपचारासाठी हलविण्यात आले आहे.

या अपघाताची सातारा तालुका पोलिस ठाण्यात नोंद झाली असून, अज्ञात ट्रक चालकावर गुन्हा दाखल करण्यात आला आहे. याबाबतचा अधिक तपास हवालदार किशोर वायदंडे आणि हवालदार विशाल मोरे हे करीत आहेत.