सातारा : सातारा तालुक्याचे भाग्यविधाते, माजी मंत्री स्व. श्रीमंत छ. अभयसिंहराजे भोसले उर्फ भाऊसाहेब महाराज यांच्या पुण्यतिथीनिमित्त मंगळवार दि. ४ रोजी विविध धार्मिक व सामाजिक कार्यक्रमांचे आयोजन करण्यात आले आहे. कर्तव्य सोशल ग्रुपच्या वतीने सायंकाळी ६.३० वाजता गांधी मैदान, राजवाडा येथे प्रसिद्ध कीर्तनकार डॉ. चारुदत्त आफळे, पुणे यांचे सुश्राव्य कीर्तन आयोजित करण्यात आले असून याचा लाभ सर्वांनी घ्यावा, असे आवाहन करण्यात आले आहे.
सकाळी ९ वाजता शेंद्रे येथील अजिंक्यतारा सहकारी साखर कारखाना येथील स्व. भाऊसाहेब महाराज यांच्या स्मृतिस्थळावर अभिवादनाचा कार्यक्रम होणार आहे. सोनवडी- गजवडी येथे खो- खो स्पर्धा (शशिकांत गाढवे), सकाळी १०.३० वाजता रिमांड होम सातारा येथे मुलांना मिष्ठान्न भोजन वाटप (प्रकाश बडेकर), ११ वाजता पंचायत समिती सातारा येथे स्व. भाऊसाहेब महाराजांच्या तैलचित्राचे अनावरण (रामभाऊ जगदाळे), दुपारी १ वाजता कळंबे ता. सातारा येथील सुविद्या माध्यमिक विद्यालयात राष्ट्रवादी सेवा दलातर्फे खाऊ वाटप (राजेंद्र लवंगारे), दुपारी ३ वाजता कल्याण पार्क विलासपूर येथे मोफत आरोग्य तपासणी शिबीर (फिरोज पठाण), सायंकाळी ६.३० वाजता गांधी मैदान, राजवाडा येथे डॉ. चारुदत्त आफळे, पुणे यांचे सुश्राव्य कीर्तन (कर्तव्य सोशल ग्रुप), सायंकाळी ७ वाजता कल्याण पार्क विलासपूर येथे ह.भ.प. प्रवीण महाराज शेलार यांचे सुश्राव्य कीर्तन (फिरोज पठाण) होणार आहे. तसेच सातारा जिल्हा मध्यवर्ती सहकारी बँकेसह जिल्ह्यातील विविध स्थानिक स्वराज्य संस्था, सहकारी संस्था, विकासेवा सोसायट्या व विविध संस्थांमध्ये अभिवादन कार्यक्रम होणार आहे.
