सातारा : हॉटेल व्यावसायिकास पिस्तुलाचा धाक दाखवून तब्बल १० लाख रुपयांच्या खंडणीची मागणी करत दरोडा टाकणाऱ्या १५ जणांच्या टोळीस स्थानिक गुन्हे शाखा व भुईंज पोलिसांनी जेरबंद केले.
अनिकेत ऊर्फ बंटी जाधव (रा. भुईंज, ता. वाई), निखिल शिवाजी मोरे, अभिजीत शिवाजी मोरे (दोघेही रा. गंगापुरी, वाई), आरिफ सिकंदर मुल्ला (वय ४३), सागर तुकाराम मोरे (वय ३४), अभिमन्यू शामराव निंबाळकर (वय २५), सुरज मुन्न शेख (वय २१), संदीप सुरेश पवार (वय २३), क्षितीज ऊर्फ सोन्या वीरसेन जाधव (वय १९), गिरिष दिलीप गवळी (वय २५), प्रज्वल बाळकृष्ण पवार (वय २३), प्रतीक बाळकृष्ण पवार (वय २८, सर्व रा. भुईंज, ता. वाई), अमोल महामुलकर (रा. महामुलकरवाडी, ता. वाई), रत्नाकर मधुकर क्षीरसागर (वय २८), निलेश उमेश मोरे (वय २५, दोघेही रा. भुईंज यांना अटक केली आहे.
याबाबत पोलिसांनी दिलेली माहिती अशी की, दि. १ जून रोजी दुपारी १.१५ वाजण्याच्या सुमारास पोलीस रेकॉर्डवरील गुन्हेगारांनी मेनवली, ता. वाई येथील एका हॉटेल व्यावसायिकास पिस्तुल रोखुन त्याच्याकडे १० लाख रुपयाच्या खंडणीची मागणी केली. तसेच त्याला जीवे ठार मारण्याची धमकी देत त्याच्या गळयातील दीड तोळे वजनाची सोन्याची चेन जबरीने चोरली. या प्रकरणी वाई पोलीस ठाण्यात गुन्हा दाखल होता.
पोलीस अधीक्षक समीर शेख, अतिरिक्त पोलीस अधीक्षक  बापू बांगर यांनी आरोपींचा शोध घेवुन त्यांना ताब्यात घेण्याच्या सूचना स्थानिक गुन्हे शाखेचे पोलीस निरीक्षक अरुण देवकर, परिविक्षाधीन पोलीस उपअधीक्षक अजय कोकाटे यांना दिल्या. त्याप्रमाणे त्यांनी भुईंज पोलीस स्टेशनचे सपोनि रमेश गर्जे, स्थानिक गुन्हे शाखेचे सपोनि संतोष पवार, सपोनि रवींद्र भोरे, पोउनि विश्वास शिंगाडे, पोउनि अमित पाटील यांच्या नेतृत्वाखाली वेगवेगळी तपास पथके तयार केली.
या तपास पथकांनी सी.सी.टी.व्ही. फुटेजची पाहणी करुन तसेच तांत्रिक मुद्यांवर गुन्ह्यातील आरोपींची माहिती मिळविली. त्यानंतर संशयित आरोपींचा भुईंज, वाई, पुणे या ठिकाणांहून शोध घेवुन १५ आरोपींना अटक केली. पुढील तपास वाई पोलीस स्टेशनचे पोलीस निरीक्षक बाळासाहेब भरणे करीत आहेत.