सातारा : सातारा शहराला शुक्रवारी मध्यरात्री मान्सूनपूर्व पावसाने झोडपून काढले. सुमारे तीन तास झालेल्या या पावसामुळे गोडोली, कोडोली, सदर बझार, लक्ष्मीटेकडी, आकाशवाणी झोपडपट्टी या भागाला चांगलाच फटका बसला. पावसाचे पाणी काही घरांमध्ये शिरल्याने नागरिकांचे प्रचंड नुकसान झाले तर ठिकठिकाणी चिखलाचे साम्राज्य पसरल्याने वाहनधारक व नागरिकांना ये-जा करताना तारेवरची कसरत करावी लागली.
जिल्ह्यासह सातारा शहराच्या वातावरणात गेल्या काही दिवसांपासून बदल झाला आहे. गुरुवारी दिवसभर ढगाळ वातावरण होते. पाऊस पडण्याची चिन्हे निर्माण झाली होती. अखेर पावसाने शुक्रवारी मध्यरात्री सर्वत्र दमदार हजेरी लावली. शहर व परिसराला मान्सूनपूर्व पावसाने अक्षरश: झोडपून काढले. गोडोली, कोडोली, सदर बझार येथील सखल भागात पावसाने पाणी साचले. काही ठिकाणी इमारतींच्या तळघरातही पाणी शिरले. शुक्रवारी सकाळपासूनच नागरिकांना पाणी बाहेर काढताना कसरत करावी लागली. या पावसाचा मोठा फटका आकाशवाणी झोपडपट्टी परिसराला बसला. अनेक झोपड्यांमध्ये पावसाचे पाणी शिरले. येथे रस्ता डांबरीकरण न करण्यात आल्याने सर्वत्र चिखलाचे साम्राज्य पसरले होते.