नवी दिल्ली : देशातील कोरोना रुग्णांच्या संख्येत दिवसेंदिवस घट पाहायला मिळत आहे. केंद्रीय आरोग्य मंत्रालयानं सोमवारी शेयर केलेल्या आकडेवारीनुसार, गेल्या 24 तासात देशात 937 कोरोना रुग्ण आढळले आहेत. देशातील एकूण कोरोना संख्या 4,46,61,516 वर पोहोचली आहे, तर सक्रिय रुग्णांची संख्या 14,515 वर गेली आहे.

देशात गेल्या 24 तासात नऊ कोरोना रुग्णांचा मृत्यू झाला आहे. यामध्ये केरळमधील सात रुग्णांचा समावेश आहे. तर, तर दोन मृत्यूंपैकी दिल्ली आणि ओडिशामध्ये प्रत्येकी एक मृत्यू झाला आहे. देशात आतापर्यंत 5,30,509 जणांनी कोरोनामुळे आपला जीव गमावला आहे.

दरम्यान, मंत्रालयाच्या वेबसाइटनुसार कोरोना रुग्णांचा रिकव्हरी रेट 98.78 टक्क्यांपर्यंत वाढला आहे. तर आतापर्यांत 4,41,16,492 लोक या आजारातुन बरे झाले आहे. तर मृत्यूचे प्रमाण 1.19 टक्के नोंदवले गेले आहे. मंत्रालयाच्या वेबसाइटनुसार, देशव्यापी कोविड-19 लसीकरण मोहिमेअंतर्गत आतापर्यंत देशात कोविड लसीचे 219.73 कोटी डोस देण्यात आले आहेत.