सातारा : पुण्यातील वाकडेवाडी येथील द शेलार यामाहा शोरुममध्ये झालेल्या चोरीचा पर्दाफाश बोरगाव पोलिसांनी केला असून चोरीच्या 4 यामाहा- एफ झेड मोटर सायकल जप्त करण्यात त्यांना यश आले आहे. संबंधित चोरट्यास अधिक तपासासाठी खडकी पोलिसांच्या ताब्यात देण्यात आलेले आहे. त्याच्याकडून आणखी मोटर सायकली चोरल्या असल्याची शक्यता व्यक्त होत आहे.
याबाबत पोलिसांनी दिलेली माहिती अशी, काल दिनांक 3 रोजी दुपारी 12.35 वा चे सुमारास बोरगाव पोलीस ठाण्याचे सहाय्यक पोलीस निरीक्षक डॉ. सागर वाघ यांच्या मार्गदर्शनाखाली पो.हवा. सुर्वे, पो.ना. निकम, पो.ना. शिखरे असे सासपडे चौक याठिकाणी एम व्ही ऍक्ट व विना मास्क कारवाई करीत असताना एकजण विना नंबर प्लेटच्या एफ झेड मोटर सायकलवरुन जात असल्याचे दिसुन या पथकाला दिसून आले. संबंधिताचा संशय आल्याने त्याचा पाठलाग करुन त्याला पकडुन त्याचा नाव, पत्ता विचारला असता त्याने त्याचे नाव नितीन दिनकर सुतार (वय 35, रा. नागठाणे, ता. जि. सातारा) असल्याचे सांगितले. त्याच्या ताब्यातील एफ झेड मोटर सायकलला नंबर प्लेट नसल्याने प्रथम त्यास मोटर सायकलच्या कागदपत्रांबाबत विचारणा केली असता तो असमाधानकारक उत्तरे देवू लागला. म्हणून सुतार यास विश्वासात घेवून त्याच्या ताब्यातील तसेच आणखी काही गाड्या चोरल्या आहेत काय याबाबत कौशल्यपूर्ण तपास करुन त्याच्याकडून वाकडेवाडी पुणे येथील द शेलार यामाहा शोरुममधून चोरलेल्या 3 एफ झेड मोटर सायकल व 1 फसीनो मोपेड बाईक अशा 4 लाख 52 हजार रुपये किंमतीच्या एकूण 4 मोटर सायकली हस्तगत करण्यात आलेल्या आहेत. आरोपीकडुन आणखी मोटर सायकली चोरल्या असल्याची शक्यता आहे. चोरीच्या गाड्यांबाबत पुणे शहरातील खडकी पोलीस ठाणे येथे गुन्हा दाखल असून सुतार यास खडकी पोलिसांच्या ताब्यात देण्यात आलेले आहे. नितीन सुतार याच्याकडे पुढील तपासात आणखी गाड्या मिळण्याची शक्यता आहे. 
ही कामगिरी पोलीस अधीक्षक अजय बन्सल, अप्पर पोलीस अधीक्षक धीरज पाटील, सहाय्यक पोलीस अधीक्षक श्रीमती आँचल दलाल, बोरगाव पोलीस ठाण्याचे सहाय्यक पोलीस निरीक्षक डॉ. सागर वाघ यांच्या मार्गदर्शनाखाली पो.हवा. सुर्वे, पो.ना. निकम, पो.ना. शिखरे यांनी केली असून पुढील तपास पो.हवा. सुर्वे करीत आहेत.