पाटण : रोमनवाडी (येराड) ता. पाटण येथे सख्खा बहिण-भावाचा शेततळ्यात बुडुन दुर्दैवी मृत्यू झाला. सोमवारी १७ रोजी सायंकाळी 5 वाजण्याच्या सुमारास  ही घटना घडली. रात्री उशिरा संबंधित बहिण-भावाचा मृतदेह तळ्यातून बाहेर काढून शवविच्छेदनासाठी पाठवून देण्यात आला. या घटनेने रोमनवाडी, येराडसह तालुक्यात शोककळा पसरली आहे.
सौरभ अनिल पवार  (वय 16) व पायल अनिल पवार (वय 14) रा. काठी ता. पाटण अशी शेततळ्यात बुडुन दुर्दैवी मृत्यू झालेल्या बहिण-भावाची नावे आहेत.
याबाबत घटनास्थळावरून मिळालेल्या माहिती अशी की, रोमनवाडी (येराड) ता. पाटण येथे सातारा येथील एका व्यक्तीचे फार्महाऊस आहे. तेथून काही अंतरावरच शेततळे असून ते सध्या काठोकाठ भरलेले आहे. या फार्महाऊसवर रोमनवाडीतील सचिन जाधव हे कामास असून सोमवारी १७ रोजी सचिन यांचे पाटण तालुक्यातीलच काठी येथील पाहुणे अनिल पवार हे पत्नी व दोन्ही मुलांसह रोमनवाडी येथे आले होते.
दरम्यान, सर्वजण फार्महाऊसवर गेलेले असता सायंकाळी ५ वाजण्याच्या सुमारास सौरभ आणि पायल शेततळ्याकडे गेले. त्यावेळी सौरभचा पाय घसरल्यामुळे तो तळ्यात पडला. तो बुडत असल्याचे पडून त्याला वाचविण्यासाठी पायलने आरडाओरडा केला. परंतु, वेळेत कोणीही मदतीसाठी न आल्याचे पाहून तिने स्वत: त्याला वाचविण्याचा प्रयत्न केला. मात्र, या प्रयत्नात तिचाही पाय घसरल्याने पायलही शेततळ्यात पडून बुडू लागली. ही घटना निदर्शनास येताच सचिन जाधव यांच्यासह मुलांच्या आई-वडिलांनी तळ्याकडे धाव घेतली. मात्र, तोपर्यंत सौरभ आणि पायल तळ्यात बुडून दिसेनाशी झाली होती.
घटनेची माहिती मिळताच परिसरातील ग्रामस्थांनी तात्काळ घटनास्थळी  धाव घेतली. दरम्यान, याबाबतची माहिती पोलिसांना देण्यात आली. त्यानंतर पोलीस घटनास्थळी पोहोचल्यावर त्यांनी पायल व सौरभचा शोध घेण्यासाठी मच्छिमारांना बोलवले. मच्छिमारांनी त्यान दोघांचा शोध घेतल्यानंतर रात्री ७ वाजण्याच्या सुमारास दोघांचे मृतदेह आढळून आले.