कराड : दोन भावंडांना सैन्यात भरती करण्याचे आमिष दाखवून 3 लाख 61 हजारांची फसवणूक झाल्याचा प्रकार बुधवारी उघडकीस आला. याप्रकरणी दोघांवर कराड ग्रामीण पोलिसांत गुन्हा दाखल झाला आहे. प्रदिप चित्राव तरडे (वय 45, रा. वाई, ता. वाई.जि. सातारा) यांनी याबाबत कराड ग्रामीण पोलिसांत फिर्याद दिली आहे.
याबाबत पोलिसांकडून मिळालेल्या माहितीनुसार, प्रदिप तारडे यांचे पुतणे श्रीकांत तरडे व श्रीधर तरडे (वय 20) हे सैन्यात भरती होण्याची तयारी करत आहेत. कराड तालुक्यातील आक्काईचीवाडी येथील दादासाहेब रामचंद्र चिकाटे याने पुतण्यास सैन्यात भरती करण्यासाठी सहा लाख द्यावे लागतील, असे सांगितले. त्यानंतर सदानंद बाणे यांना कोल्हापूर येथे जाऊन भेटावे लागेल, असेही सांगितले. त्यानुसार तरडे यांनी वेळोवळी पाच लाख दहा हजार रूपये या दोघांना दिले. मात्र त्यांनी भरती प्रक्रियेत मदत करण्यास टाळाटाळ केली. कालांतराने आपली फसवणूक झाल्याचे लक्षात येताच तरडे यांनी पैशाची मागणी सुरु केली. संशयितांनी त्यांना एक लाख 49 हजार रुपये परत दिले. मात्र उर्वरीत रक्कम देण्यास टाळाटाळ केली. त्यानंतर तरडे यांनी बुधवारी कराड ग्रामीण पोलिसांत फिर्याद दाखल केली.