दिल्ली : व्हॉट्सऍपवर कम्युनिटीज, इनचॅट पोल आणि ग्रुप व्हिडिओ कॉलिंग संदर्भात भन्नाट फीचर लाँच करण्यात आले आहे. व्हॉट्सऍपच्या ग्रुप व्हिडिओ कॉलमध्ये आता एकाच वेळी 32 सदस्य सहभागी होऊ शकतील. यापूर्वी केवळ आठ युजर्स सहभागी होऊ शकत होते. याशिवाय ग्रुप सदस्यांची संख्या वाढवली आहे. एका ग्रुपमध्ये आता 1024 सदस्य जोडले जाऊ शकतात, यापूर्वी ही मर्यादा 512 इतकी होती.

व्हॉट्सऍपची मालकी असलेल्या मेटा कंपनीचे संस्थापक मार्क झुकरबर्ग यांनी गुरुवारी व्हॉट्सऍपवरील नव्या फीचर्सची घोषणा केली. यापैकी महत्त्वाचे फीचर म्हणजे कम्युनिटी ग्रुप. या वर्षाच्या सुरुवातीला कंपनीने या फीचरबाबत घोषणा केली होती, त्यानंतर विविध झोनमध्ये त्याच्या चाचण्या सुरू होत्या.

समान रुची असलेल्या लोकांना एकाच छताखाली आणणे हे याचे उद्दिष्ट आहे. कम्युनिटी ग्रुप फीचरमुळे युजरला आता वेगवेगळे ग्रुप तयार करण्याची गरज नाही. युजरने आवश्यक सदस्यांची कम्युनिटी तयार केली की हवा असलेला मेसेज इच्छीत युजरला पाठवता येईल.

मोठी फाईल करा शेअर

व्हॉट्सऍपवर आता 2 जीबीपर्यंत फोटो, व्हिडिओ आणि डॉक्युमेंट्स शेअर करता येणार आहे. याआधी केवळ 16 एमबी एवढीच मर्यादा असल्यामुळे त्याहून अधिक साईजचे डॉक्युमेंट पाठवण्यासाठी युजर्स इतर ऍपचा पर्याय निवडताना दिसत होते. व्हॉट्सऍप ग्रुपमध्ये इन-चॅट पोलदेखील घेता येणार आहे. या फीचरच्या माध्यमातून ग्रुपमधील सदस्य एखाद्या प्रश्नावर आपले मत नोंदवू शकणार आहेत. व्हॉट्सऍपने हे फीचर कसे दिसेल आणि त्याची कार्यक्षमता अद्याप उघड केलेली नाही. नवीन फीचर्ससाठी व्हॉट्सऍप अपडेट करावे लागेल.