दिल्ली : केंद्रीय रस्ते वाहतूक आणि महामार्ग मंत्री नितीन गडकरी यांनी मध्य प्रदेशला सुमारे साडेपाच हजार कोटींचे 13 रस्ते प्रकल्प दिले आहेत. दरम्यान, एका रस्त्याच्या निकृष्ट बांधकामाबद्दल गडकरींनी जनतेची जाहीर माफीही मागितली आहे. मंडला आणि जबलपूर येथे आयोजित कार्यक्रमात केंद्रीय रस्ते वाहतूक आणि महामार्ग मंत्री गडकरी यांनी रस्त्यांचे उद्घाटन केले. यावेळी गडकरी यांनी मांडला-जबलपूर महामार्गाबाबत चर्चा करत मांडला ते बारेला या रस्त्याच्या बांधकामाचा उल्लेख केला. यासोबतच त्यांनी महामार्ग बांधकामाच्या दर्जाबाबत नाराजी व्यक्त करत मांडला व परिसरातील नागरिकांच्या रस्त्यामुळे होणाऱ्या गैरसोयीबद्दल मंचावरून दिलगिरी व्यक्त केली.

राष्ट्रीय महामार्गाच्या जुन्या कामाची दुरुस्ती करून रस्त्याच्या खराब झालेल्या भागाच्या कामासाठी लवकरच नवीन निविदा काढण्याचे निर्देश त्यांनी संबंधित अधिकाऱ्यांना दिले. मांडला ते बारेला हा चारशे कोटींचा 63 किमी लांबीचा दोन लेनचा रस्ता होत आहे. या कामावर मी समाधानी नाही, असंही गडकरी यावेळी म्हणाले.  

केंद्रीय मंत्री गडकरी म्हणाले की, मांडला हे निसर्गाचे निवासस्थान आहे, ही राणी दुर्गावतीची भूमी आहे आणि कान्हासारखे जगप्रसिद्ध राष्ट्रीय उद्यान येथे आहे. आदिवासींच्या विकासासाठी रस्ते बांधणी अत्यंत महत्त्वाची आहे. यावेळी गडकरी यांनी परिवहन मंत्रालयाने देशभरात ऊर्जा क्षेत्रात सुरू केलेल्या नवीन प्रकल्पांची सविस्तर माहिती दिली. तसेच त्यांनी मध्य प्रदेशात परिवहन क्षेत्रात इलेक्ट्रिक बस चालवण्याची गरज व्यक्त केली.

मांडला, दिंडोरी व इतर आदिवासी भागात बांबू उत्पादनाला चालना देता येईल, असेही गडकरी म्हणाले. भविष्यात बांबूपासून इथेनॉल तयार केले जाईल, ज्याचा वापर वाहतूक आणि इतर क्षेत्रांसाठी ऊर्जा निर्मितीसाठी केला जाऊ शकतो. या कार्यक्रमाला मुख्यमंत्री शिवराज सिंह चौहान, सार्वजनिक बांधकाम मंत्री गोपाल भार्गव, केंद्रीय मंत्री फग्गन सिंह कुलस्ते आणि इतर नेते उपस्थित होते.