सातारा : पैशाच्या हव्यासापोटी महिलेने एका प्रतिष्ठित डॉक्टरला प्रेमाच्या जाळ्यात फसवून तब्बल 60 लाख रूपयांची खंडणी मागितल्याची धक्कादायक प्रकार समोर आला आहे. याप्रकरणी शाहुपूरी पोलिसांनी खंडणी मागणार्‍या महिलेसह तिला सहाय्य करणार्‍या एका महिलेला अटक केली आहे. तसेच याच प्रकरणातील एका अल्पवयीन मुलीला ताब्यात घेण्यात आले आहे. त्यांना न्यायालयात हजर केले असता दोन्ही महिलांना 4 दिवसांची पोलिस कोठडी, तर त्या अल्पवयीन मुलीची रवानगी बाल सुधारगृहात करण्यात आली आहे. डॉक्टरला बदनामीची भीती दाखवत महिलेनेच अशा प्रकारचे कृत्य केल्याने सातार्‍यात खळबळ उडाली आहे. 
सातारा शहरातील राजवाडा परिसरात संबंधित डॉक्टर राहतो. या डॉक्टरचे खंडणी मागणार्‍या महिलेशी प्रेमसंबध जुळले होते. त्यानंतर ते दोघे व्हिडिओ कॉलवरून एकमेकांसोबत संपर्क करत होते. जास्त दिवस संपर्क झाला असल्याने या दरम्यान दोघांनी एकमेकांसोबत अश्‍लिलपणे व्हिडिओ कॉलिंग सुरू ठेवले होते. अनेक वेळा असे व्हिडिओ कॉल झाले. प्रत्येकवेळी अश्‍लिल व्हिडिओ कॉल झाल्यानंतर संबंधित महिलेने या व्हिडिओ कॉलचे स्क्रिनशॉट सेव्ह करून ठेवले होते.
हे स्क्रिन शॉट व्हायरल करण्याची धमकी देत महिलेने त्या डॉक्टरला तब्बल 60 लाख रूपयांची खंडणी मागितली. वारंवार ही महिला त्या डॉक्टरच्या दवाखान्यात जाऊन बदनामी करण्याची धमकी देत होती. या तडजोडीअंती 60 लाख रूपये देण्याचे संबंधित डॉक्टरने मान्य केले. त्यानुसार डॉक्टरने पहिला हफ्ता म्हणून 12 लाख रूपये त्या महिलेला दिले होते.
उर्वरित पैशांसाठी महिलेने संबंधित डॉक्टरांच्यामागे तगादा लावला होता. या तगाद्याला कंटाळून अखेर डॉक्टरने शाहुपूरी पोलिस ठाण्यात याबाबत तक्रार दिली. या तक्रारीची पडताळणी केल्यानंतर सपोनि विशाल वायकर यांनी सापळा रचून खंडणीची उर्वरित रक्कम स्विकारताना संबंधित महिलेला रंगेहाथ पकडले. पकडल्यानंतर पोलिसांनी आपला खाक्या दाखवल्यानंतर तिने यापूर्वी डॉक्टरकडून खंडणी म्हणून 12 लाख रूपये घेतले आहे. या पैशातून दागिने खरेदी केल्याचे सांगितले. हे दागिनेही पोलिसांनी जप्त केले आहेत. 
ही कारवाई सहाय्यक पोलीस अधीक्षक समीर शेख यांच्या मार्गर्शनाखाली सपोनि विशाल वायकर, संदीप शितोळे, हवालदार हसन तडवी व कर्मचार्‍यांनी केली. पुढील तपास सहाय्यक पोलीस निरीक्षक विशाल वायकर करत आहेत.