सातारा : घराच्या बांधकामासाठी बोअरचे पाणी का दिले, या कारणावरून साप, ता. कोरेगाव येथे एकाला मारहाण करून तुझ्यासह तुझी पोल्ट्री पेटवून टाकेन, अशी धमकी दिल्याप्रकरणी एकावर रहिमतपूर पोलीस ठाण्यात गुन्हा दाखल झाला आहे.
याबाबत पोलिसांनी दिलेली माहिती अशी, दि. 17 रोजी 11 वाजण्याच्या सुमारास साप, ता. कोरेगाव हद्दीतील शिवारात ज्ञानेश्वर रघुनाथ काटकर (वय 43) रा.  ज्योतिबाचा माळ, रहिमतपूर, ता. कोरेगाव यांना श्रीकांत भागवत गायकवाड (वय 32) रा. अंभेरी, ता. कोरेगाव यांनी बोलावून घेऊन तुम्ही विनोद सावंत यांना घराच्या बांधकामासाठी बोरचे पाणी का दिले अशी विचारणा करीत लाकडी दांडक्याने मारहाण केली. तसेच तुझ्यासह तुझी पोल्ट्री पेटवून टाकीन. तुला जिवंत ठेवणार नाही, अशी धमकी देऊन त्यांच्या हातात असलेला सहा हजार रुपये किंमतीचा मोबाईल हिसकावून घेऊन तो फोडून सहा हजार रुपयांचे नुकसान केल्याची तक्रार रहिमतपूर पोलिस ठाण्यात दाखल केली आहे.