फलटण : फलटण तालुक्यातील सरपंचपद आरक्षण सोडत तात्काळ रद्द करण्यात यावी. अत्यंत चुकीच्या पद्धतीने सरपंचपद आरक्षण सोडत काढण्यात आली आहे. त्यामुळे फलटण तालुक्यातील आरक्षण सोडत प्रक्रिया पुन्हा पार पाडावी, अन्यथा तीव्र आंदोलन करण्यात येईल, असा इशारा भाजपाचे फलटण शहराध्यक्ष अमोल सस्ते यांनी निवदेनाद्वारे दिला आहे.
 याबाबत फलटण उपविभागीय अधिकारी यांना देण्यात आलेल्या निवेदनात म्हटले आहे की, फलटण तालुक्यातील 131 ग्रामपंचायतींच्या निवडणूक निकालानंतर जिल्हाधिकार्‍यांच्या आदेशान्वये सरपंचपदाच्या झालेल्या आरक्षण सोडतीत अनेक त्रुटी आढळल्या आहेत. या आरक्षण सोडतीत सर्वसाधारणसाठी 76 (38 महिला, 38 खुले), ओबीसी प्रवर्गासाठी 35 (18 महिला, 17 खुले), अनुसूचित जाती प्रवर्गासाठी 19 (महिला दहा, खुले नऊ) अशी सरपंचपदे आरक्षित करण्यात आली, तर अनुसूचित जमाती महिलांसाठी एक अशी आरक्षणे सोडतीत निश्चित करण्यात आली. त्यापैकी अनुसूचित जाती प्रवर्गातील 19 पैकी 13 गावात या प्रवर्गातील उमेदवारच नाही. त्यामुळे या 13 गावांचा कारभार कसा चालणार? तसेच याचा अर्थ असा की, केवळ सहा जागांवरच या प्रवर्गाची बोळवण केली असल्यामुळे सरळ सरळ अनुसूचित जाती प्रवर्गावर अन्याय करणारे हे आरक्षण असल्याचे सिद्ध होत आहे. त्यामुळे याबाबत शासनाने तात्काळ योग्य तो निर्णय घेवून फलटण तालुक्यातील सरपंचपद आरक्षण सोडत रद्द करून नव्याने सरपंचपद आरक्षण सोडत घेण्यात यावी, अन्यथा शासनाविरोधात तीव्र स्वरूपाचे आंदोलन करण्यात येईल, असा इशाराही निवेदनाद्वारे देण्यात आला आहे. 
यावेळी फलटण शहराध्यक्ष अमोल सस्ते, अशोकराव जाधव, जयकुमार शिंदे यांच्यासह फलटण तालुक्यातील भाजपाचे विविध पदाधिकारी व कार्यकर्ते उपस्थित होते.