सातारा : गेल्या तीन दिवसापासून कोरोना बाधित संख्येचा आलेख स्थिर राहिल्याने आरोग्य यंत्रणेला मोठा दिलासा मिळाला आहे. जिल्ह्यात बाधितांचा संक्रमण दर 29 टक्क्यावर कायम आहे. दरम्यान जिल्ह्यात गेल्या चोवीस तासात 1540 बाधित रुग्ण आढळले असून एका बाधिताचा मृत्यू झाला आहे.
गेल्या दीड वर्षाहून अधिक काळ कोरोनाशी सामना करत असतानाच आता ओमायक्रॉन संक्रमणाने डोके वर काढले आहे. त्यामुळे प्रशासनाला मोठी कसरत करावी लागत आहे. जिल्हा परिषद व जिल्हा रुग्णालयाची आरोग्य यंत्रणा मोठया प्रमाणावर बाधित झाल्याने रुग्णसेवेवर प्रचंड ताण पडला आहे .
बाधित रुग्णांचा प्रसार रोखण्यासाठी व गैरसोय टाळण्यासाठी तालुकानिहाय कोरोना केअर सेंटर सुरु केले आहेत. कोरोनाचा प्रादुर्भाव वाढत असला तरी जास्तीत जास्त नागरिकांच्या कोरोना चाचण्या करुन मृत्यूदर कमी करण्यासाठी प्रशासनाचे प्रयत्न करत आहेत. तसेच हॉटस्पॉट झालेल्या ठिकाणी उपाययोजना आखण्यात भर दिला जात आहे. याचबरोबर जास्तीत-जास्त नागरिकांचे लसीकरण केले जात आहे. प्रशासकीय व खासगी कार्यालयांमध्ये नागरिकांनी अनावश्‍यक गर्दी टाळण्याचे आवाहन जिल्हा प्रशासनाने केले आहे. दरम्यान जिल्ह्यात गेल्या चोवीस तासात 5245 चाचण्या करण्यात आल्या होत्या. त्यामधील 1540 बाधित रुग्ण आढळून आल्याची माहिती आरोग्य विभागाने दिली आहे.