सातारा : राज्यभरातच स्वबळावर निवडणुका लढण्याचा नारा काँग्रेस पक्षाचा आहे, आणि स्थानिक स्वराज्य संस्थाही त्याला अपवाद नाहीत. त्यामुळे आम्ही सातारा नगरपालिकेची निवडणूक स्वबळावर लढण्यास केव्हाही तयार आहे, आताच्या परिस्थितीत काँग्रेस पक्षाचे सातारा नगरपालिकेत कमीतकमी आठ ते दहा नगरसेवक निवडून येतील, असा विश्वास  व्यक्त करण्यात आला.
केंद्र सरकारच्या कृषी, औद्योगिक धोरणांच्या निषेधार्थ देशभरातील सर्व शेतकरी संघटना, डाव्या आघाड्यांनी सोमवार, दि. २७ रोजी भारत बंद पुकारला असून त्यामध्ये काँग्रेस सहभागी होणार आहे. त्याची माहिती काँग्रेसच्या नेत्यांनी रविवारी सातारा येथे पत्रकार परिषदेत दिली. त्यावेळी जिल्हाध्यक्ष डॉ. सुरेश जाधव यांना आगामी नगरपालिका निवडणूका आणि खास करुन सातारा नगरपालिका तसेच जिल्हा बँक निवडणुकीत काँग्रेसची काय भूमिका राहणार, याविषयी छेडले असता त्यांनी आपली भूमिका स्पष्ट झाली. सातारा येथील शासकीय विश्रामगृहावर झालेल्या या पत्रकार परिषदेस महिला प्रदेश कार्यकारिणी सदस्या रजनी पवार, ॲड. विजयराव कणसे, जिल्हा सरचिटणीस ॲड. दत्तात्रय धनवडे, नरेश देसाई, अन्वर पाशा खान, रफिक बागवान, मनोजकुमार तपासे आदी उपस्थित होते.
सातारा नगरपालिका निवडणुकीत काँग्रेस जिल्हाध्यक्ष म्हणून आपली भूमिका काय? असा प्रश्न डॉ. सुरेश जाधव यांना विचारला असता त्यांनी राज्यातील सर्वच स्थानिक स्वराज्य संस्थांमध्ये काँग्रेसचा स्वबळाचा नारा असल्याचा पुनरुच्चार केला. ते म्हणाले, 'नगरपालिका निवडणुकीत स्थानिक परिस्थिती नेमकी काय आहे. याबाबत कार्यकर्त्यांशी चर्चा करणार असून त्यांचीही मते आम्ही जाणून घेणार आहे. त्यानंतर आम्ही आवश्यक तो निर्णय घेणार आहे. साताऱ्यात भाजपविरोधात सर्व पक्ष एकत्र येण्याची शक्यताही आहे. त्यामुळे येथे महाविकास आघाडीचा पर्याय निर्माण होवू शकतो. जर हा प्रयोग अथवा पर्याय नाही झाला तर आम्ही स्वबळावर लढणार आहे. त्याविषयी कोणतीही शंका नाही.'
दरम्यान, जर सातारा नगरपालिकेत आम्ही स्वतंत्र लढलो तर आमच्या पक्षाचे कमीत कमी आठ ते दहा नगरसेवक निवडून येतील अशी ही स्पष्ट केले.

पृथ्वीराजबाबांनी जयकुमारांना झिडकारले..!
सातारा जिल्हा काँग्रेसच्या पदाधिकाऱ्यांनी सातारा जिल्हा मध्यवर्ती सहकारी बँक निवडणुकीच्या अनुषंगानेही भाष्य केले. जिल्हा बँक निवडणुकीत आम्ही चार जागा मागितल्या आहेत. आम्ही आमच्या मागण्यांवर ठाम आहे. चार जागा सन्मानाने दिल्यातर आम्ही राष्ट्रवादीबरोबर आहे. अन्यथा आमचे स्वतंत्र पॅनल असणार आहे, असे सांगण्यात आले. बँक निवडणुकीत नेमके काय करायचे याचा अंतिम निर्णय आमचे नेते पृथ्वीराज चव्हाण घेणार आहेत. त्यांच्याशी चर्चा करुनच आम्ही पुढील रणनीती ठरवणार असल्याचे यावेळी सांगण्यात आले. दरम्यान, जिल्हा बँक निवडणुकीत सर्वपक्षीय विरोधी पॅनलच्या अनुषंगाने पृथ्वीराज चव्हाण आणि गृह राज्यमंत्री शंभूराज देसाई यांची चर्चा झाली आहे. सर्वपक्षीयमध्ये येण्यासाठी माण -खटावचे भाजप आ. जयकुमार गोरे उत्सुक होते. त्यांनी तसा प्रस्ताव पृथ्वीराजबाबांसमोर ठेवला होता. मात्र, तुम्हाला आम्ही सर्वपक्षीय पॅनलमध्ये घेणार नसल्याचे सांगत त्यांना झिडकारले आहे. असे काँग्रेस जिल्हाध्यक्ष डॉ. सुरेश जाधव, ॲड. विजयराव कणसे, अन्वरपाशा खान, रफिक बागवान यांनी एकमुखी सांगून टाकले.