वाई : वाईहून पाचगणीला जाताना पसरणी घाटात चालकाला घाटातील एक वळण लक्षात न आल्याने कार संरक्षक कठड्यावरुन काही फूट गेली. मात्र, 400 फूट दरीत कोसळण्याच्या बेतात असलेली ही कार (क्र. एमएच 12 ओटी - 6672) एका झाडाला धडकल्याने दरीत कोसळली नाही आणि कारमधील तिघाजणांचे प्राण वाचले. 
याबाबत माहिती अशी, पुण्याहून पाचगणीला राहण्यासाठी स्थानिक कुलीन ठक्कर व त्यांचे कुटुंबीय आले होते. काही कामानिमित्त ते आज वाईला आले होते. वाईतील कामे संपवून पसरणी घाटातून पाचगणीला जात असताना सोळा नंबर स्टॉपजवळ मुसळधार पाऊस आणि घाटातील धुक्यामुळे चालकाला वळणाचा अंदाज न आल्याने त्यांची गाडी संरक्षक कठड्यावर चढून दरीच्या बाजूला घुसली. काही फूट अंतरावर ती दरीच्या दिशेने गेली. मात्र झाडात अडकल्यामुळे या गाडीतील एक पुरुष व दोन महिलांचे प्राण वाचले. या अपघातात सुदैवाने कोणतीही जिवीतहानी झाली नाही. गाडीचे किरकोळ नुकसान झाले आहे. या अपघातात कोणीही जखमी झाले नाही. ही माहिती मिळताच वाई पोलिसांनी तात्काळ पसरणी घाटात धाव घेतली. क्रेनच्या साह्याने संबंधित गाडी बाहेर काढण्यात आली असून अपघाताची नोंद वाई पोलीस ठाण्यात करण्यात आली आहे.