कराड : पुणे-बंगलोर महामार्गावरील कराडच्या कोल्हापूर नाक्यावर भरधाव ट्रकने दुचाकीला धडक दिली. या भीषण अपघातात दुचाकीवरील दाम्पत्याचा जागेवरच मृत्यू झाल्याची घटना आज घडली.
याबाबत पोलिसांकडून मिळालेल्या माहितीनुसार, कोल्हापूर नाक्यावर कोल्हापूर-पुणे महामार्गावरून कराड शहरात प्रवेश करणार्‍या दुचाकीला पाठीमागून आलेल्या भरधाव ट्रकने जोरदार धडक दिली. ट्रकने दिलेली धडक इतकी भीषण होती की, धडक बसल्यावर दुचाकीवरील दांम्पत्य काही अंतरावर फरपटत गेले. त्यात त्यांच्या डोक्याला गंभीर मार लागला. या धडकेत दुचाकीवरील पुरुष व महिला जागीच ठार झाले. घटनेनंतर घटनास्थळावरून ट्रकचालकाने पोबारा करण्याचा प्रयत्न केला. मात्र, पोलिसांनी पाठलाग करून ट्रकसह चालकाला पोलीस ठाण्यात आणले. घटनास्थळी वरिष्ठ पोलीस निरीक्षक बी. आर. पाटील यांनी भेट देऊन पाहणी केली. या अपघाताची नोंद करण्याचे काम रात्री उशिरापर्यंत कराड शहर पोलीस ठाण्यात सुरु होते.