सातारा : गणेश शंकर पैलवान या युवकावर राजवाडा परिसरातील चांदणी चौकात दोघांकडून कोयत्याने वार करण्यात आले. सायंकाळी साडेचारच्या दरम्यान वर्दळीच्या रस्त्यावर ही घटना घडल्याने एकच गोंधळ झाला. वार करणाऱ्या युवकांनी तेथून पलायन केले. शाहूपुरी  पोलिसांनी घटनास्थळी धाव घेऊन सीसीटीव्ही फूटेज तपासण्यास सुरवात केली आहे.
सातारा शहर परिसरात गेल्या दोन दिवसात कोयत्याने वार करण्याचे सलग दोन प्रकार घडले आहेत. यामुळे नागरिकांमध्ये भीतीचे वातावरण निर्माण झाले आहे. शुक्रवारी सायंकाळी गणेश पैलवान राजवाडा परिसरातून जात असताना दोन युवकांनी त्यांच्यावर कोयत्याने अचानक हल्ला केला. या हल्ल्यात पैलवान गंभीर जखमी होऊन खाली कोसळले. या थरारक प्रकारामुळे राजवाडा परिसरात एकच पळापळ झाली. कोयत्याच्या वाराने पैलवान गंभीर जखमी झाले आहेत.
गंभीर जखमी युवकास उपचारासाठी शासकीय रुग्णालयात दाखल केले. मात्र जास्त रक्तस्त्राव होत असल्याने गणेश पैलवान यास पुणे येथील ससून रुग्णालयात पाठवण्यात आले आहे. शाहूपुरी पोलीस घटनास्थळी दाखल झाले आणि त्यांनी पंचनाम्याला तातडीने सुरवात केली. हल्लेखोर दोन्ही युवक फरारी झाले असल्याची प्राथमिक माहिती मिळाली आहे शाहूपुरी पोलीस तपास करत आहेत.