सातारा : जांब, ता.खटाव येथील विश्वासराव शिंदे व कैलास शिंदे यांच्या गोठ्यात शेजारी, शेजारी असलेल्या गंजीला अचानक लागलेल्या आगीत दोन हजार कडबा व शेतीपूरक साहित्य जळून खाक झाला. सुदैवाने या आगीत जीवीत हानी झाली नाही.
याबाबतची मिळालेली माहिती अशी, जांब येथील विठोबाचा माळ या ठिकाणी विश्वास शिंदे व कैलास शिंदे या भावांनी शेजारी, शेजारी नुकत्याच गंजी लावून ठेवल्या होत्या. ज्वारीची सुगी संपल्यानंतर येथील शेतकरी पावसाळ्यात जनावरांना ज्वारीच्या कडबा व गवताच्या गंजी लावून ठेवतात. सोमवारी दुपारच्या प्रहरात  शिंदे कुटुंबातील महिलांना गंजीतून धुर निघालेला दिसला. त्यांनी लगेच आरडाओरडा करून आजूबाजूला असलेल्या शेतकर्‍यांना मदतीला बोलावून घेतले. आसपास असलेल्या शेतकर्‍यांनीही हाक कानावर पडताच त्वरेने घटनास्थळी धाव घेऊन आजूबाजूला असलेल्या गोठ्यातून हाताला लागेल ते भांडे घेऊन पाणी आणण्यासाठी नजीकच्या हापशीकडे धाव घेतली. तथापि, तोपर्यंत आगीने रौद्र रुप धारण केले होते. एव्हाना दोन्हीही गंजीने चांगलाच पेट घेतला होता. सुदैवाची गोष्ट ही की, तोपर्यंत चांगलाच जमाव गोळा झाला. त्यांच्या मदतीने शेजारच्या वस्तीत असलेल्या बोअरला पाईप जोडून गंजीवर पाण्याचा फवारा सुरू केला त्यामुळे आग आटोक्यात आणण्यात यश आले. अन्यथा आजूबाजूच्या वस्तीत आग पसरून मोठा अनर्थ घडला असता.
आगीचे कारण समजू शकले नाही. मात्र आगीत वैरणीचे मोठे नुकसान झाले असून सध्या जनावरांना उन्हाळ्याच्या दिवसात खायला एकही पेंडी शिल्लक नसल्यामुळे जनावरांना खायला काय घालायचे? हा प्रश्न शिंदे कुटुंबियांना पडला आहे. झालेल्या नुकसानीचा रीतसर पंचनामा करून शासनाने मदत करावी, अशी मागणी शिंदे कुटुंबियांनी केली आहे.