सिडनी: ऑस्ट्रेलिया विरूद्धच्या तिसर्‍या कसोटीत भारतीय फलंदाजांनी चौथ्या डावात दमदार प्रत्युत्तर दिलं. ऋषभ पंतने केलेल्या धडाकेबाज खेळीमुळे तिसर्‍या सामन्याच्या शेवटच्या दिवशी सामना रंगतदार अवस्थेत पोहचला आहे. आता भारताच्या विजयाच्या आशा पल्लवीत झाल्या असून सारी मदार आता हनुमा विहारी आणि आश्विनवर आहे. भारताने चहापानाच्या वेळेपर्यंत 5 बाद 280 धावांपर्यंत मजल मारली. आता शेवटच्या सत्रात विजयासाठी भारताला 127 धावांची तर ऑस्ट्रेलियाला 5 बळींची गरज आहे.
कर्णधार अजिंक्य रहाणे पहिल्या सत्रात लवकर बाद झाल्यानंतर ऋषभ पंतने सामन्याची सूत्र हाती घेतली. त्याने सुरूवातीला सावध खेळ केला, पण नंतर मात्र त्याने सुसाट फलंदाजी केली. त्याचं शतक अवघ्या तीन धावांनी हुकलं. पंतने 12 चौकार आणि 3 षटकारांची आतषबाजी करत 118 चेंडूमध्ये 97 धावा कुटल्या. नॅथन लायनच्या फिरकीपुढे तो बाद झाला. त्यानंतर काही वेळाने अत्यंत संयमी खेळी करणारा पुजारादेखील त्रिफळाचीत झाला. त्याने 205 चेंडूत 77 धावा केल्या.
आता शेवटच्या सत्रात रविचंद्रन अश्विन, हनुमा विहारी आणि रविंद्र जाडेजा यांच्यावर भारताची मदार आहे. जाडेजा दुखापतग्रस्त असला तरी गरज पडल्यास तो फलंदाजीला येणार असल्याचं सांगण्यात आलं आहे.