दिल्ली : दिवंगत माजी पंतप्रधान राजीव गांधी याच्या मारेकऱ्यांची सुटका करण्याच्या सर्वोच्च न्यायालयाच्या आदेशावर काँग्रेसने प्रश्नचिन्ह उपस्थित केले आहे. सुप्रीम कोर्टाचा माजी पंतप्रधान राजीव गांधी यांच्या मारेकऱ्यांची सुटका करण्याचा निर्णय पूर्णतः अस्वीकारार्ह व चूक आहे, असे काँग्रेसने म्हटले आहे.

काँग्रेस सरचिटणीस जयराम रमेश यांनी शुक्रवारी यासंबंधी एक निवेदन जारी केले. त्यात ते म्हणाले - "सर्वोच्च न्यायालयाने देशाच्या भावनेनुसार काम केले नाही ही अत्यंत दुर्दैवी गोष्ट आहे. हे अक्षम्य कृत्य असून, काँग्रेस त्याचा स्पष्ट आक्षेप नोंदवते." राजीव गांधी यांची २१ मे १९९१ रोजी तामिळनाडूच्या श्रीपेरंबदूर येथे श्रीलंकेच्या लिबरेशन टायगर्स ऑफ तमिल ईलमच्या (LTTE) एका महिला आत्मघातकी हल्लेखोराने हत्या केली होती. या प्रकरणी न्यायालयाने ७ जणांना मृत्युदंडाची शिक्षा ठोठावली होती.

पण सन २००० मध्ये राजीव यांच्या पत्नी तथा माजी काँग्रेस अध्यक्षा सोनिया गांधी यांच्या हस्तक्षेपानंतर नलिनी श्रीहरनच्या शिक्षेचे जन्मठेपेत रुपांतर करण्यात आले होते. त्यानंतर २००८ मध्ये राजीव गांधी यांच्या कन्या प्रियंका गांधी वढेरा यांनीही वल्लोर तुरुंगात नलिनीची भेट घेतली होती. २०१४ मध्ये इतर ६ आरोपींच्या शिक्षेतही कपात करण्यात आली होती. त्याचवर्षी तामिळनाडूच्या तत्कालीन मुख्यमंत्री जे. जयललिता यांनी त्यांच्या सुटकेसाठी प्रयत्न केले होते.