सातारा : सातारा जिल्ह्यातील कोरोना रुग्णांचा वाढता आकडा पाहता प्रशासनाने कडक पावले उचलावीत आणि ४ ते ५ दिवस पूर्ण लॉकडाउन करावा अशी मागणी आज भारतीय जनता पार्टीने जिल्हाधिकारी यांच्याकडे केली.
यावेळी बोलताना भाजपा जिल्हाध्यक्ष विक्रम पावसकर म्हणाले, की सातारा जिल्ह्यातील कोरोना रुग्णांची संख्या वाढत आहे. अशीच परिस्थिती राहिली तर पूर्ण जिल्हा धोकादायक परिस्थितीत  जाऊ शकतो, ही साखळी तोडायची असेल तर संपूर्ण जिल्हा पूर्ण लॉकडाउन करावा आणि टेस्ट वाढवाव्यात, तसेच जिल्ह्यात येताना पोलीस प्रशासनाच्या पूर्व परवानगी शिवाय प्रवेश देऊ नये. सातारा जिल्ह्यातून कोरोनाला हद्दपार करायचे आहे आणि त्यासाठी  सर्वानी सोशल डिस्टसिंग पाळावे. 
गर्दी करू नये. प्रशासनाने आमच्या मागणीचा विचार करून निर्णय घ्यावा,अशीही मागणी विक्रम पावसकर यांनी केली. यावेळी सातारा शहराध्यक्ष आणि नगरसेवक विकास गोसावी, विट्ठल बलशेटवार, राहुल शिवनामे, विक्रम बोराटे आणि पदाधिकारी कार्यकर्ते उपस्थित होते.