कराड : गेल्या चार-पाच महिन्यापासून कोरोना महामारीने सर्वत्र हाहाकार माजवला आहे. परंतू या महामारीत पाळावयाच्या नियमापैकी सोशल डिस्टन्सिंग न पाळता येणारा व्यवसाय म्हणजे देहविक्री... देहविक्री करणार्‍या वारांगणांची या कालावधीत फारच दुर्लक्षित आणि विदारक परिस्थिती निर्माण झाली आहे. वारांगणांच्या जीवनाला नवे स्थैर्य प्राप्त करून देण्यासाठी नगरपालिकेच्या माध्यमातून वारांगणांसाठी बचत गट स्थापण्याचा ऐतिहासिक संकल्प हाती घेण्यात आला आहे.
कोरोना महामारीमुळे सर्व जगाची चक्रे स्तब्ध झाली आहेत. सर्वच व्यवसाय अडचणीत आले आहेत.  यामध्ये वेश्या व्यवसायाचाही समावेश होतो. कराड हे तालुक्याचे ठिकाण असून शिक्षणाचे माहेरघर आहे. त्यामुळे आजुबाजूच्या गावातून, शहरातून लोक वारांगणाकडे लपून छपून येतात. हा व्यवसाय असाच सुरु राहिला तर वारांगणासह त्या व्यक्तीचे आरोग्य धोक्यात येऊ शकते व त्यांच्यामुळे त्यांच्या कुटुंबात व  समाजात कोरोनाचा संसर्ग होऊ शकतो. कोरोनाच्या संकटात वारांगणाकडे येणार्‍यांवर अटकाव व्हावा आणि तेथील महिलांचे प्रबोधन व त्यांच्या पोटापाण्याचा प्रश्‍न सोडविण्यासाठी प्रयत्न केले पाहिजेत. ही उदात्त भावना ठेवून  कराड नगरपालिकेचे मुख्याधिकारी रमाकांत डाके यांनी वारांगणासाठी बचत गट स्थापण्याचा ऐतिहासिक संकल्प मांडला आहे. त्यासाठी नगरपालिका सर्व सहकार्य करेल. असेही सांगितले आहे. कोरोनाच्या संकटातून बाहेर पडेपर्यंत या व्यवसायापासून वारांगणांनी परावृत्त रहावे असे आवाहन मुख्याधिकारी रकामांत डाके यांनी केले आहे.