मुंबई : अवघ्या महाराष्ट्रालाच नव्हे तर अवघ्या भारताला खळखळून हसवणारं एक मोठं व्यक्तिमत्त्व म्हणजे अशोक सराफ. अशोक सराफ हे इंडस्ट्रीमधल्या प्रत्येकाचे मामा आहेत आणि या मामांनी त्यांच्या आयुष्याची 75 वर्ष नुकतीच पूर्ण केली. वयाच्या अमृत महोत्सवासोबत आपल्या कारकिर्दीची सुद्धा 50 वर्ष मामांनी पूर्ण केली आणि त्याच साठी एक जंगी सेलिब्रेशन म्हणून अशोक मामांच्या दैदीपम्यान कारकिर्दीला सलाम करण्यासाठी एका खास कार्यक्रमाचं आयोजन झी मराठीवर करण्यात आलं आहे. 

अशोक मामांनी 4 जून रोजी आपल्या वयाची पंचाहत्तर वर्ष पूर्ण केली. त्याच दिवशी निवेदिता सराफ यांनी एका खास कार्यक्रमाचं आयोजन करत अशोक मामांच्या आयुष्यावर आधारित पुस्तकाची घोषणा केली होती. या पुस्तकाचंअनावरण सुद्धा या कार्यक्रमात होणार आहे. 'बहुरंगी अशोक' असं या कार्यक्रमाचं नाव असून मराठीतील अनेक कलाकार येऊन मामांच्या यशस्वी करिअरमधल्या खास आठवणी, काही कडक परफॉर्मन्स सादर करणार आहेत.

यासंबंधी झी मराठीच्या सोशल मीडियावर सध्या दमदार प्रमोशन होताना दिसत आहे. अनेक मराठी कलाकरांना अशोक मामांच्या काही गाजलेल्या भूमिकांच्या क्लिप्स दाखवत त्यांना त्या भूमिकेचं आणि चित्रपटाचं नाव ओळखायचं असं चॅलेंज दिल्याचं अनेक विडिओ मध्ये दिसत आहे. माझा पती करोडपती चित्रपटातील कॅप्टन बाजीराव रणगाडे, सुपरहिट अशी ही बनवाबनवी चित्रपटातला धनंजय माने, नवरा माझा नवसाचा मधील कंडक्टर लालू, गंमत जम्मत मधील फाल्गुन, एक डाव धोबीपछाड मधील दादा दांडगे, बुटाचा भाऊ मधील बंडू अशी एकाहून एक अफलातून पात्र अशोक मामांनी अमर केली आहेत.