कराड : सामाजिक कार्यांमध्ये कराड तालुक्यात अग्रेसर असणारा श्री मळाई ग्रुप, शेतीमित्र अशोकराव थोरात यांचे मार्गदर्शनाखाली व डॉ.स्वाती थोरात यांचे नेतृत्वाखाली मोफत वैद्यकीय सल्ला देण्यासाठी श्री मळाई कोरोना हेल्पलाइन सुरू करत आहे.
सध्याच्या कोरोना महामारीमध्ये पेशंट व बेड यांचे प्रमाण व्यस्त आहे. रुग्ण आणि जनता सैरभैर झाली आहेत. शिंक आली तरी लोक घाबरत आहेत. अज्ञान, भीती, अविश्वास आणि अपुरे ज्ञान या गोष्टींमुळे रुग्ण गंभीर होत आहेत. समाजामध्ये अनागोंदी माजली आहे. शासकीय यंत्रणा आम्ही अजूनही खूप चांगले आहोत हे दर्शविण्यात गुंतले आहेत. रुग्ण ऑक्सीजन, बेडच्या प्रतीक्षेत घरीच मृत्यूशी झुंज देत आहेत. अशाच परिस्थितीत रुग्णांना धीर देऊन योग्य तपासणी, वेळेवर  सुयोग्य उपचार मिळाल्यास होम आयसोलेशन द्वारे 50 ते 60 टक्के रुग्ण घरीच बरे होऊ शकतील. तसेच सिस्टिमवरचा बोजा कमी करता येऊ शकेल. 
हेल्पलाईन द्वारे रुग्णांना दिवसातून दोन वेळेस मोफत व्हिडिओकॉलद्वारे वैद्यकीय सल्ला, सर्व औषधे, पल्स, ऑक्सी मिटर, थर्मामीटर, सँनिटायझर, होम सँनिटेशन या सर्व गोष्टी नाममात्र दरात मळाई ग्रुप मार्फत उपलब्ध होतील. व्हिडिओ कॉल द्वारे तज्ञ डॉक्टरांच्या मार्फत पेशंटवर निगराणी ठेवून ऑक्सिजनची कमतरता आढळल्यास ताबडतोब ऑक्सिजन पुरवठा करून रुग्णास ऑक्सीजन बेड उपलब्ध करून देण्यासाठी मदत केली जाईल.
समाजातील सर्व गरीब गरजू रुग्णांसाठी ही सेवा श्री मळाई ग्रुप मार्फत मोफत सुरू आहे. या मोफत सेवेचा लाभ सर्व गरजूंनी घ्यावा असे आवाहन श्री मळाई ग्रुपचे सर्वेसर्वा, शेतीमित्र श्री अशोकराव थोरात यांनी केले.
अमृत हॉस्पिटल मलकापूरच्या डॉ.स्वाती थोरात, संजीवनी हॉस्पिटल कोल्हापूरच्या डॉ.स्वाती पाटील, दुशेरे पोलीस पाटील संदीप जाधव, नगरसेवक मलकापूर,  श्री मळाईदेवी नागरी पतसंस्था व संपूर्ण मळाई ग्रुप यासाठी सहकार्य करत आहे.
समारंभास मलकापूरचे नगरसेवक अजित थोरात, संदीप जाधव, अण्णा काशीद, 
मळाईदेवी पतसंस्थेच्या चेअरमन अरुणादेवी पाटील, आदर्श ज्युनियर कॉलेज मलकापूरचे प्राचार्य एस.वाय.गाडे, उपप्राचार्य एस.बी.शिर्के मान्यवर ग्रामस्थ उपस्थित होते.