पाटण : राज्य व जिल्हा प्रशासनाने कोरोनाचा प्रादुर्भाव नियंत्रणात आल्यानंतर नुकतीच प्राथमिक शाळा सुरु करण्यास परवानगी दिली. त्यामुळे तब्बल पावणेदोन वर्षांनंतर जिल्ह्यातील शाळा सुरु झाल्या. परंतु, कोयनानगर येथील पहिली ते चौथीपर्यंतची शाळा अद्यापी सुरु झालेली नाही. त्यामुळे विद्यार्थ्यांसह पालकांतून नाराजी व्यक्त केली जात आहे.
पावसाल्याने झालेल्या अतिवृष्टीमुळे पाटण तालुक्यातील काही भागात भूस्खलन झाले होते. तसेच अनेकांच्या डोक्यावरचे छप्पर गेल्याने त्यांना प्रशासनाने बंद असलेल्या शाळांच्या खोल्यांमध्ये स्थलांतरित केले होते. त्यातील बहुतांशी लोकांचा अद्यापी येथेच मुक्काम असल्याने शाळा सुरू करण्यास अडचण निर्माण होत आहे. त्यामुळे लवकरच प्रशासनाने दरडग्रस्तांचे अन्यत्र स्थलांतर करून शाळा सुरू करण्यात येणार असल्याचे शाळा व्यवस्थापनाने स्पष्ट केले आहे. त्यामुळे शिक्षण विभाग यावर काय तोडगा काढणार, याकडे सर्वांचे लक्ष लागले आहे.
कोरोना महामारीच्या संकटामुळे दीड वर्षापासून बंद असणाऱ्या शाळा बुधवार दि. १ रोजी सुरु झाल्या आहेत. परंतु, पाटण तालुक्यातील कोयनानगर येथील पहिली ते चौथीची जिल्हा परिषद प्राथमिक शाळा याला अपवाद ठरली असून या शाळेत मिरगाव येथील भूस्खलन बाधितांना स्थलांतरित करण्यात आले आहे. सध्या संपूर्ण गावाचा या शेळेतच मुक्काम असल्याने शाळा बंद ठेवली लागली आहे.