सातारा : जिल्हा नियोजन समितीमधुन विविध तालुक्यातील विकास कामे प्रस्तावित केली होती. त्यापैकी एकूण रुपये 24 कोटी रुपयांची सातारा जिल्ह्यातील प्रत्येक तालुक्यामधील विविध विकास कामे मंजूर करण्यात आली आहेत, अशी माहीती खासदार श्रीमंत छत्रपती उदयनराजे भोसले यांनी एका प्रसिध्दीपत्रकाव्दारे दिली आहे.
जलमंदिर पॅलेस येथुन प्रसिध्दीस दिलेल्या प्रसिध्दीपत्रकात खासदार श्रीमंत छत्रपती उदयनराजे भोसले यांनी नमुद केले आहे की, जिल्हा नियोजन समितीच्या माध्यमातुन जिल्ह्यातील विकासकामांचा आराखडा तयार करण्यात येत असतो. या आराखड्यास राज्यशासनाकडून मंजूरी मिळाल्यावर आराखड्यातील एकूण रकमेची कामे मार्गी लागतात. जिल्हा नियोजन समितीमध्ये आम्ही स्वतः सदस्य आहोत. नियोजन समितीचा सदस्य आणि संसदेचा लोकप्रतिनिधी म्हणून आम्ही सातारा जिल्ह्यातील विविध तालुक्यातील नियोजन समितीमधुन होणारी विकास कामे प्रस्तावित केली होती. या कामांपैकी एकूण सुमारे 24 कोटीरुपयांची खालील प्रमाणे तालुकानिहास विकास कामे मंजूर करण्यात आली आहेत. या विकास कामांत विविध गावपातळीवरील रस्ते, गटर्स, समाजमंदिरे, स्मशानभुमी संदर्भातील रस्ते, प्रतिक्षा शेड आदी विकास कामांचा समावेश आहे.
विकास ही निरंतर चालणारी प्रक्रीया आहे. सर्वसामान्यांच्या विकासाकरिता, राज्यासह प्रामुख्याने केंद्राच्या निधीचा सुयोग्य उपयोग करुन घेवून, विकास साधण्याचा आमचा प्रयत्न राहीला आहे. यामध्ये सामान्य ग्रामस्थ हाच केंद्रबिंदू मानुन, राजकारण विरहित समाजोपयोगी विकासकामे मार्गी लावण्यासाठी आमचे अखंड प्रयत्न आहेत. त्याचाच भाग म्हणून जिल्हा नियोजन समितीमधून सुमारे 24 कोटींपेक्षा जास्त विकास कामे प्रस्तावित करण्यात आली होती. प्रस्तावित कामांपैकी, जवळजवळ सर्व विकासकामे मंजूर करण्यात आली आहेत. याकामी  सन्माननीय पालक मंत्री, नियोजन समितीचे सर्व सदस्य आणि संबंधीत अधिकारी यांचे सहकार्य लाभले, असेही खासदार श्रीमंत छत्रपती उदयनराजे भोसले यांनी शेवटी नमुद केले आहे.