सातारा : कराड तालुक्यातील उंब्रजमध्ये शाळा-कॉलेजात शिकणाऱ्या विद्यार्थीनींच्या छेडछाडीच्या घटनांमध्ये वाढ झाली असून पोलिसांकडून बंदोबस्त होत नसल्यामुळे सध्या सडकसख्याहरींनी उच्छादच मांडला आहे. त्यांच्या वाढत्या उपद्रवामुळे मुलींना रस्त्यावरून वावरणे अवघड झाल्याने त्यांची शिक्षणाची वाट बिकट झाली आहे.
उंब्रज हे कराड तालुक्यातील बाजारपेठेचे मोठे गाव असून उंब्रजसह आजुबाजूच्या गावातील असंख्य विद्यार्थी- विद्यार्थिनी या ठिकाणी शिक्षणासाठी येत असतात. त्यातील मुली शाळेच्या दिशेने जाताना व परतताना तसेच सायंकाळी क्लासला येताजाता मोक्याच्या ठिकाणी दबा धरून बसलेली टवाळखोरांची टोळधाड चेकाळते. गाडीवरून कर्कश्य हॉर्न वाजवत धूम स्टाईल जाणे, अर्वाच्य बोलणे, येताजाता कमेंट पास करणे अशा उचापती सातत्याने घडत आहेत. महामार्गापासून महात्मा गांधी विद्यालयाच्या रस्त्याला, गोडवाडी रस्त्याला, देशमुख क्लासेस, कृष्णा अपार्टमेंटच्या मागे, सुरभि चौक, भवानी पेठ परिसरात या सडकसख्याहरींचा उच्छाद सुरू असतो.
या टवाळखोरांच्या रोजच्या त्रासाने मुली व त्यांचे पालक हैराण झाले असून सर्वसामान्य जनतेलाही हा प्रकार नकोसा झाला आहे. पण भांडणे - मारामाऱ्या होतील म्हणून कोणी टवाळखोरांच्या वाटेला जात नाहीत. पोलिसांनी या मोकाट सुटलेल्या टवाळखोरांचा बंदोबस्त करावा, अशी मागणी पालक वर्गातून होत आहे.