कराड : कराड शहरात सापळा रचून दोघा चैन स्नॅचर्सना जेरबंद करण्यात कराड गुन्हे प्रकटीकरण शाखेला यश आले असून या दोघांकडून तब्बल 6 गुन्ह्यांची उकल झाली आहे. तसेच 5 लाख 66 हजारांचा मुद्देमाल जप्त करण्यात आला आहे.
याबाबत पोलिसांनी दिलेली माहिती अशी की, कराड शहर पोलीस ठाणे हद्दीत चैन स्नॅचिग करणार्‍या गुन्हेगारांबाबत खास गोपनीय बातमीदारांमार्फत बातमी मिळाली होती की, दुशेरे, ता.कराड गावातील दोन इसम हे महागड्या पल्सर सारख्या गाड्या घेवून चैन स्नॅचिंग करत आहेत. सदर अनुषंगाने शोध घेतला असता. चोरी करणारे दोन्ही आरोपी हे 15 दिवसापासून फरार झालेले होते. गुन्हे प्रकटीकरण शाखेच्या पथकाने त्यांची माहिती काढून आरोपी कर्नाटक राज्यात पळून जाण्याच्या बेतात असताना त्यांना शनिवार दि.28 रोजी सकाळी 10 वा. दत्तचौक कराड याठिकाणी सापळा लावून अटक करण्यात आली आहे. संबंधित आरोपींकडे गुन्ह्याच्या अनुषंगाने तपास केला असता आरोपींनी कराड शहर पो.ठाणे हद्दीत वेगवेगळ्या ठिकाणी 6 चैन स्नॅचिंगचे गुन्हे केल्याची कबुली दिली आहे. यामध्ये 4 लाख 46 हजार रुपये किंमतीची सोन्याची 6 मंगळसुत्र व गुन्ह्यात वापरलेल्या 1 लाख 20 हजार रुपये किंमतीच्या 2 मोटार सायकल असा एकुण 5 लाख 66 हजार रुपये किंमतीचा मुद्देमाल जप्त करण्यात आला आहे.
यातील आरोपींंना अटक करुन न्यायालयात हजर केले असता त्यांना न्यायालयाने पोलीस कस्टडी दिली. या गुन्ह्याचा पुढील तपास गुन्हे प्रकटीकरण शाखा कराडचे सपोनि विजय गोडसे हे करीत आहेत.
ही कामगिरी पोलीस अधीक्षक अजयकुमार बन्सल, अपर पोलीस अधीक्षक धीरज पाटील, उपविभागीय पोलीस अधिकारी डॉ. रणजीत पाटील व कराड शहर पोलीस ठाण्याचे वरिष्ठ पोलीस निरीक्षक बी.आर.पाटील यांच्या मार्गदर्शनाखाली गुन्हे प्रकटीकरण शाखेचे प्रभारी अधिकारी सहा.पोलीस निरीक्षक विजय गोडसे, पोउपनि भरत पाटील, पोउपनि भैरवनाथ कांबळे, सफौ राजेंद्र पुजारी, पोहवा सतीश जाधव, नितीन येळवे, जयसिंग राजगे, पोलीस नाईक संजय जाधव, सचिन साळुखे, पोलीस कॉस्टेबल मारुती लाटणे, विनोद माने, प्रफुल्ल गाडे, तानाजी शिंदे, आनंदा जाधव यांनी केली आहे.