सातारा : महिलेच्या गळ्यातील सोनसाखळी हिसकावून मोटार सायकल वरून पलायन करणाऱ्या कोंडवे, तालुका सातारा येथील दोन साखळी चोरांना कोरेगाव पोलिसांनी तपासानंतर ताब्यात घेतले आहे. त्यांच्याकडून 80 हजार रुपयांचा मुद्देमाल जप्त करण्यात आला आहे.
इंद्रजीत मोहन गुरव वय 24 राहणार कोंडवे व अभिजीत प्रदीप महामुनी राहणार कोंडवे वय 27 अशी संशयितांची नावे आहेत.
या प्रकरणाची माहिती अशी, दिनांक 6 नोव्हेंबर रोजी दुपारी दोन वाजता फिर्यादी वैशाली विजय खटावर राहणार एमएसईबी ऑफिसच्या पाठीमागे कोरेगाव या घराच्या बाहेर उभ्या असताना मोटरसायकल वरून आलेल्या दोन अनोळखी इसमानी त्यांच्या गळ्यातील दोन तोळे वजनाचे मंगळसूत्र जबरीने ओढून चोरी करून नेले. त्यानुसार कोरेगाव पोलीस ठाण्यात गुन्ह्याची नोंद करण्यात आली होती. पोलीस अधीक्षक समीर शेख व अप्पर पोलीस अधीक्षक बापू बांगर यांच्या सूचनेप्रमाणे पोलीस निरीक्षक नितीन सावंत आणि गुन्हे प्रकटीकरण विभागाचे पथकाने तपास सुरू केला.
तपास पथकाने घटनास्थळी भेट देऊन आजूबाजूचे साक्षीदार यांच्याकडे विचारपूस केली. तसेच परिसरातील सीसीटीव्ही फुटेज तपासले आणि तांत्रिक विश्लेषण व गोपनीय माहितीच्या आधारे हा गुन्हा पोलीस रेकॉर्डवरील गुन्हेगार इंद्रजीत गुरव, अभिजीत महामुनी यांनी केल्याचे स्पष्ट झाले. या दोघांना पोलिसांनी ताब्यात घेतले असून त्यांच्याकडून 80 हजार रुपये किमतीचे सोन्याचे मंगळसूत्र हस्तगत करण्यात आले आहे.
या कारवाईमध्ये पोलीस उपनिरीक्षक विशाल कदम, सचिन साळुंखे, समाधान शेडगे, अविनाश घाडगे, सायबर पोलीस ठाण्याचे सुशांत कदम, महेश पवार यांनी सहभाग घेतला होता.