कॅनबेरा: ऑस्ट्रेलिया सरकार आणि गुगलच्या वादात आता मायक्रोसॉफ्टने ऑस्ट्रेलिया सरकारच्या निर्णयाला पाठींबा दिला आहे. गुगलला बातम्यांसाठी शुल्क आकारण्याच्या ऑस्ट्रेलियाच्या निर्णयाला मायक्रोसॉफ्टने पाठिंबा दर्शववत बिंग या सर्च इंजिनसाठी जाहिराती घेताना शुल्क न आकारण्याची ग्वाहीही दिली आहे. ऑस्ट्रेलियाच्या सरकारने बातम्यांसाठी गुगलकडून शुल्क आकारण्याबाबत कायदा करण्याचा निर्णय जाहीर केल्यानंतर, गुगलच्या अधिकार्‍यांनी सिनेटसोबतच्या सुनावणीत ऑस्ट्रेलियात गुगलची सेवा थांबवण्याचे सूतोवाच केले होते. त्यानंतर मायक्रोसॉफ्टला आपले सर्च इंजिन बिंगसाठी बाजारपेठ विस्तारण्याची संधी मिळाली आहे.
‘ऑस्ट्रेलिया सेंटर फॉर रिस्पॉन्सिबल टेक्नॉलॉजी’ या त्रयस्थ संस्थेने मायक्रोसॉफ्टच्या भूमिकेचे स्वागत केले असून गुगलच्या सेवा थांबवण्याच्या धमकीबाबत नाराजी व्यक्त केली आहे. गुगल आणि फेसबुकचा ऑस्ट्रेलियातील वरचष्मा हा ते ऑस्ट्रेलियाच्या नागरिकांप्रती आदर दाखवतील तोपर्यंतच शक्य आहे, असेही या संस्थेचे संचालक पीटर ल्युईस यांनी सुनावले आहे.
बिंग हे ऑस्ट्रेलियातील दुसर्‍या क्रमांकाचे सर्च इंजिन असले, तरी त्यांचा मार्केटमध्ये केवळ 3.6 टक्के वाटा आहेत, असे वेब विश्लेषण करणारी सेवा स्टॅटा काऊंटरचे म्हणणे आहे. आपला 95 टक्के वाटा असल्याचे गुगलचे म्हणणे आहे. स्विनबर्न विद्यापीठाच्या माध्यम क्षेत्रातील वरिष्ठ प्राध्यापक बेलिंडा बार्नेट यांच्यामते ऑस्ट्रेलीयात बिंग गुगलची जागा घेण्यास सक्षम आहे.
गेल्या आठवड्यात मायक्रोसॉफ्टचे मुख्य कार्यकारी अधिकारी सत्या नडेला यांची ऑस्ट्रेलियाचे पंतप्रधान स्कॉट मॉरिसन आणि दळणवळण मंत्री पॉल फ्लेचर यांच्यासोबत ऑनलाइन बैठक झाली. या बैठकीत मायक्रोसॉफ्टने ‘न्यूज मीडिया बार्गेनिंग कोड’ला संपूर्ण पाठिंबा व्यक्त केल्याचे मायक्रोसॉफ्टचे अध्यक्ष बॅड स्मिथ यांनी सांगितले. मॉरिसन यांनीही नडेला यांच्यासोबत झालेल्या बैठकीत ऑस्ट्रेलियात गुगलची जागा बिंग घेणार असल्याबाबत चर्चा झाल्याचे स्पष्ट केले.