सातारा : मास्क न वापरणे, सोशल डिस्टन्सचे उल्लंघन करून वाहतुकीचे नियम तोडणाऱ्या वाहनधारकांवर कराड शहर वाहतूक शाखेने धडक कारवाई केली. त्यांच्याकडून २८ लाख ३९ हजार ६०० रुपयांचा दंड वसूल करण्यात आला असल्याची माहिती  वाहतूक शाखेच्या सूत्रांनी दिली. सप्टेंबर २०२० पासून सातारा जिल्ह्यात अशा प्रकारची कारवाई करण्याचे आदेश जिल्हाधिकारी शेखर सिंह यांनी पारित केले होते.
सप्टेंबर २०२० पासून कराड शहर वाहतूक शाखेच्या माध्यमातून मास्क न वापरणे, सोशल डिस्टन्सचे उल्लंघन करणाऱ्या १६७९ वाहनचालकांवर कारवाई करून त्यांच्याकडून ८ लाख ३४ हजार ५०० रुपयांचा दंड वसूल केला. कराड शहरात वाहतुकीचे नियमन करत असताना नियम मोडणाऱ्या ९६३८ वाहनचालकांवर कारवाई करून त्यांच्याकडून २० लाख ५१ हजार १०० रुपयांचा दंड वसूल करण्यात आलेला आहे. सप्टेंबर २०२० मध्ये कोरोना विषाणूच्या अनुषंगाने पारित केलेले आदेश व वाहतूक नियम मोडणाऱ्या वाहनचालकांवर कारवाई करून वाहतूक नियंत्रण शाखेने २८ लाख ३९ हजार ६०० रुपयांचा दंड वसूल केला आहे. ही कारवाई कराड शहर वाहतूक नियंत्रण शाखेचे पोलीस निरीक्षक विजय गोडसे यांच्यासह त्यांच्या पथकाने केली.
दरम्यान कराड शहरातील कोरोनाचा प्रादुर्भाव रोखण्यासाठी जिल्हाधिकाऱ्यांनी दिलेल्या आदेशाप्रमाणे मास्कचा वापर करून सोशल डिस्टन्स पाळून वाहतुकीचे नियमांचे पालन करावे असे आवाहन करण्यात आले आहे.