कराड : तालुक्यातील तुळसण येथे मॉर्निंग वॉकला चाललेल्या दोन अल्पवयीन मुलींवर दुचाकीवर आलेल्या एकाने खुनी हल्ला केला असून या हल्ल्यात सोळा वर्षाची मुलगी गंभीर जखमी झाली आहे. तिच्यावर कराड येथील कृष्णा रुग्णालयात उपचार सुरू आहेत. कराड तालुक्यात घडलेल्या या घटनेमुळे सातारा जिल्ह्यात खळबळ उडाली असून, या प्रकाराने परिसरात दहशतीचे वातावरण निर्माण झाले आहे. याबाबत सविस्तर माहिती अशी की, तुळसण ता. कराड येथील दोन अल्पवयीन सख्ख्या बहिणी दि. 3 रोजी पहाटे मॉर्निंगवॉक साठी निघाल्या होत्या. यावेळी गावापासून जवळच निर्मनुष्य रस्त्यावर तुळसणकडून दुचाकीवरून भरधाव वेगात आलेल्या व्यक्तीने त्या दोन्ही मुलींवर धारदार शस्त्राने हल्ला केला, यामध्ये एका १६ वर्षाच्या अल्पवयीन मुलीच्या हाताला गंभीर दुखापत झाली आहे. तातडीने त्या मुलीस उपचारासाठी कराड येथील कृष्णा रुग्णालयात दाखल केले आहे. तिची प्रकृती स्थिर असल्याचे रुग्णालय सूत्रांनी सांगितलेला आहे. हल्ल्यानंतर हल्लेखोर कोळेवाडीच्या दिशेने भरधाव वेगाने पसार झाला. घटनेच्यावेळी मॉर्निंगसाठी आलेल्या अन्य लोकांनी संबंधित हल्लेखोरास पकडण्याच्या प्रयत्न केला असता तो सापडला नाही. याबाबत कराड तालुका पोलीस ठाण्यात घटनेची नोंद झाली असून अधिक तपास पोलीस निरीक्षक किशोर धुमाळ करीत आहेत. दरम्यान भल्या सकाळी कराड तालुक्यातील अल्पवयीन मुलीवर झालेल्या हल्ल्यामुळे दहशतीचे वातावरण निर्माण झाले असून, हल्लेखोराला ताब्यात घेऊन त्याच्यावर कारवाई करण्याची मागणी तालुक्यातून केली जात आहे.