पुसेगाव: राष्ट्रवादी काँग्रेस पक्षाच्या माध्यमातून पुसेगाव पंचक्रोशी व खटाव तालुक्याच्या उत्तर भागातील लोकहिताच्या कामांना सर्वतोपरी सहकार्य करण्याची ग्वाही खासदार श्रीनिवास पाटील यांचे चिरंजीव सारंग पाटील यांनी दिली. 
पुसेगांव ग्रामपंचायतीस सारंग पाटील यांची आज भेट देऊन कामकाजाची पाहणी केली. त्यावेळी ते बोलत होते. यावेळी जिल्हा परिषदेचे उपाध्यक्ष प्रदीप विधाते, पंचायत समिती सदस्य संतोष साळुंखे, सरपंच विजय मसणे, उपसरपंच पृथ्वीराज जाधव, ग्रामविकास अधिकारी काझी, ग्रामपंचायत सदस्य शिवाजीराव जाधव, मधुकर टिळेकर, सुरेशशेठ जाधव, संतोष तारळकर, विशाल जाधव, गणेश जाधव, सत्यम जाधव, सोहराबभाई शिकलगार, सुरज जाधव, अजय जाधव, संजय जाधव, गणेश मदने उपस्थित होते. 
खासदार श्रीनिवास पाटील यांचा सातारा लोकसभा मतदारसंघातील सर्व तालुके व गांवे यांच्या विकास कामांचा आढाव व प्रत्यक्ष प्रस्तावित विकास कामांची पहाणी तसेच अडीअडचणी व समस्या जाणून घेऊन त्याप्रमाणे पुढील कार्यवाहीसाठी मतदारसंघात दौरा सुरु आहे. यावेळी पाटील यांनी पुसेगांव मधील विविध सार्वजनिक प्रश्न, विकास कामे याबाबत सरपंच, उपसरपंच, ग्रामपचायत सदस्य यांच्याशी चर्चा केली. 
पुसेगांव मधील लोकहिताच्या कामासाठी सर्वतोपरी सहकार्य करण्याची त्यांनी ग्वाही दिली. गांवातील रस्ते, जुन्या बुधरोड वरील धोकादायक पुल, गोरे वस्ती येथील विद्युत ट्रान्सफार्मर अशा विकासकामांसाठी तत्काळ कार्यवाही करण्याबाबत संबंधित विभागाना सूचना देण्यात आल्या. याप्रसंगी जिल्हा परिषदेचे उपाध्यक्ष प्रदीप विधाते यांनी उत्तर खटाव तालुक्यातील सर्व विकास कामे करण्यासाठी विशेष प्रयत्न करणार आहे अशी ग्वाही दिली. 
सरपंच विजय मसणे, उपसरपंच पृथ्वीराज जाधव व ग्रामपंचायत सदस्यांनी विविध विकास कामांची मागणी करणारे निवेदन यावेळी पाटील यांना दिले. या राष्ट्रवादी काँग्रेसचे पुसेगाव शहरप्रमुख राम जाधव यांनी आभार मानले.