मुंबई: आयपीएल 2022 च्या हंगामात दहा संघ खेळणार आहेत. गुरुवारी अहमदाबाद येथे झालेल्या भारतीय क्रिकेट नियामक मंडळाच्या (बीसीसीआय) 89 व्या वार्षिक सर्वसाधारण सभेत नव्या दोन संघांना मान्यता देण्याचा निर्णय घेण्यात आला आहे. 
याशिवाय प्रथम श्रेणीच्या सर्व खेळाडूंना (महिला आणि पुरुष) करोना महामारीमुळे सामने न होऊ शकल्यामुळे योग्य तो मोबदला देण्यावरही एकमत झालं आहे. 2028 च्या लॉस एंजेलिस ऑलिम्पिकमध्ये क्रिकेटचा समावेश करण्याबाबतही या सभेमध्ये निर्णय झाला.
दरम्यान, 10 संघांचा समावेश झाल्यास, अडीच महिन्यांच्या कालावधीत 94 सामने खेळवताना आंतरराष्ट्रीय वेळापत्रक बिघडण्याची भीती आहे. त्याचबरोबर परदेशी खेळाडूंची उपलब्धता हाही कळीचा मुद्दा आहे. त्याचबरोबर प्रसारणकर्ते प्रत्येक वर्षी 60 सामन्यांसाठी पैसे मोजत असतात. स्टार इंडियाने 2018-2022 या कालावधीसाठी प्रत्येक 60 सामन्यांच्या मोसमाकरिता 16347 कोटी रुपये मोजले आहेत. त्यामुळे सामन्यांची संख्या वाढल्यास, त्यांच्याशी नव्या कराराबद्दल बोलणी करावी लागेल. त्यामुळे यंदा आयपीएलमध्ये आठ संघ असतील. 2022 च्या हंगामात आयपीएलमध्ये दहा संघाचा समावेश असेल.