चेन्नई: आयपीएलच्या इतिहासात सर्वाधिक महागडा खेळाडू ठरण्याचा विक्रम भारताच्या युवराज सिंगच्या नावे होता. यंदाच्या आयपीएल लिलावात हा विक्रम मोडीत काढत ख्रिस मॉरिस आयपीएलच्या इतिहासातील सर्वात महागडा खेळाडू ठरला आहे. त्याच्यासाठी राजस्थान रॉयल्सने तब्बल 16 कोटी 25 लाख रूपयांची बोली लावली. 
युवराजला दिल्लीनं 16 कोटी रुपयांत खरेदी केलं होतं. 2021 च्या आयपीएल लिलावात ख्रिस मॉरिसला राजस्थान रॉयल्सनं 16 कोटी 25 लाख रुपयांची बोली लावत आपल्या ताफ्यात दाखल करुन घेतलं आहे. 75 लाख रुपयांची मूळ किंमत असणार्‍या ख्रिस मॉरिसला खरेदी करण्यासाठी संघमालकांमध्ये रस्सीखेच झाली. आरसीबी, चेन्नई, पंजाब आणि राजस्थान या संघानं ख्रिस मॉरिसला आपल्या संघात घेण्यासाठी रस दाखवला. मात्र, राजस्थान संघानं 16 कोटी 25 लाख रुपये खर्च करत आपल्या संघात घेतलं आहे. 
ख्रिस मॉरिसनं गतवर्षीच्या आयपीएलमध्ये आरसीबीकडून खेळताना 9 सामन्यात 11 बळी घेतले होते. गेल्या आयपीएलच्या लिलावत मॉरिसला 10 कोटी रुपयांत आरसीबीनं खरेदी केलं होतं. मात्र, यंदा आरसीबीनं मॉरिसला करारमुक्त केलं होतं.
आयपीएलच्या इतिहासातील यापूर्वीचे सर्वात महागडे ठरलेल्या खेळाडूंमध्ये युवराज सिंह (16 कोटी, दिल्ली संघ, 2015), पॅट कमिन्स (15 कोटी, पाच लाख रूपये, कोलकाता संघ, 2020),  बेन स्टोक (14.5 कोटी, 2017), युवराज सिंग ( 14 कोटी, 2014), बेन स्टोक्स (12.5 कोटी, राजस्थान रॉयल्स संघ, 2018) यांचा समावेश होता.