कराड : सैदापूर (ता. कराड) येथे वास्तव्यास असणार्‍या एकाच कुटुंबातील सख्ख्या तीन बहिणींचा अकाली मृत्यू झाला आहे. आस्था (वय 9), आयुषी (वय 3), आणि आरुषी (वय 8) अशी मृत्यू झालेल्या दुर्दैवी बहिणींची नावे आहेत. या घटनेने कराड पुन्हा एकदा शहारले असून मृत मुलींचा व्हिसेरा राखून ठेवण्यात आला आहे.
याबाबत मिळालेली माहिती अशी की, शिवानंद सासवे हे आपल्या कुटुंबासह सैदापूर येथील मिलिटरी हॉस्टेल नजीक राहत आहेत. काल (गुरुवारी) त्यांनी नातेवाईकांसोबत एकत्रित जेवण केले होते. त्यानंतर रात्री तीन मुलींसह आईला उलट्या व जुलाबाचा त्रास सुरू झाला होता. त्रास जास्त होत असल्याने या तिन्ही मुलींना मलकापूर येथील कृष्णा हॉस्पिटलमध्ये उपचारासाठी दाखल करण्यात आले होते. मात्र उपचारावेळी त्यांचा मृत्यू झाला.
दरम्यान, मृत्यू झालेल्या मुलींचा व्हिसेरा राखून ठेवण्यात आला आहे. तो पुण्यातील प्रयोगशाळेत तपासणीसाठी पाठवण्यात येणार आहे. अन्नातून विषबाधा झाली असावी असा प्राथमिक अंदाज व्यक्त होत आहे. मात्र तपास पूर्ण झाल्यावर सर्व चित्र स्पष्ट होणार आहे. सहाय्यक पोलिस निरीक्षक राहुल वरोटे घटनेचा तपास करत आहेत.