मेढा : पवारवाडी ता. जावली येथील किनारी देवीच्या मंदिराच्या दानपेटीतील रोख रक्कम चोरणाऱ्या संशयितास मेढा पोलिसांनी अवघ्या चार तासात अटक केली आहे.

याबाबत सविस्तर माहिती अशी की, शुक्रवार दि. 13 रोजी रात्री अज्ञात चोरट्याने पवारवाडी येथील किनाळीदेवीच्या मंदिरात चोरी केली होती. या मंदिरातील दानपेटीतून रोख 2 हजार 500 रूपये व देवीच्या गळ्यातील सोन्याचे मणी असलेली माळ असा ऐवज चोरून नेला होता. याप्रकरणी शंकर बाबुराव यांनी ढवळे यांनी मेढा पोलिस ठाण्यात तक्रार दिली होती. मंदिरात पैसे व दागिने चोरी झाल्याने या तपासाचे पोलिसांसमोर आव्हान बनले होते. घटनेचे गांभीर्य ओळखून पोलिसांनी श्वानपथक, ठसे तज्ञ तसेच एलसीबीच्या पथकाने घटनास्थळी भेट दिली होती. पोलिस तपास करत असतानाच संशयित दोघांची नावे समोर आली. पोलिसांनी दोघांना ताब्यात घेत त्‍यांची चौकशी केली असता, दोघांनी चोरीची कबुली दिली.तसेच त्‍यांच्याकडून रोख रकमेपैकी 970 रूपये व सोन्याच्या मण्याची माळ पोलिसांनी जप्त केली. 

मेढा पोलीस ठाण्याचे सपोनि जीवन माने, फौजदार सागर गवसणे, हवालदार नितीन पवार, अभिजीत सुतार, संजय शिर्के, नितेश कणाके, अमर जाधव, संजू काळे यांनी या कारवाईत सहभाग घेतला अवघ्या 4 तासामध्ये या गुन्ह्याचा छडा लावण्यात पोलिसांना यश आल्‍याने भक्‍तवर्गातुन पोलिसांच्या कार्याचे कौतुक होत आहे.