सातारा : कोल्हापूर, सांगली येथे आलेल्या महापूरामुळे हजारो कुटुंबांना झळ पोचली त्याचबरोबर या दोन जिल्हयातील वाचनालयांमधील पुस्तकांचेही नुकसान झाले होते. त्यामुळे, मसाप शाहुपुरी शाखेने वाचनालयांना पुस्तकमदत करण्याचे ठरवले होते, त्यासाठी जिल्हयातील दानशूरांनी नवी पुस्तके दानरुपाने मसाप, शाहुपुरी शाखेकडे जमा करावेत असे आवाहन शाखेतर्फे करण्यात आले होते. त्याला जिल्हयातील दानशूरांना उत्स्फूर्त प्रतिसाद दिला. शाखेकडे 1 लाख 36 हजार 756 रुपयांची एक हजारहून अधिक दर्जेदार पुस्तके जमा झाली असून लवकरच ही पुस्तके कोल्हापूर, सांगली जिल्हयातील वाचनालयांना प्रदान करण्यात येणार असल्याची माहिती मसाप, शाहुपुरी शाखेचे अध्यक्ष विनोद कुलकर्णी यांनी प्रसिध्दीपत्रकाव्दारे दिली आहे.

सांगली, कोल्हापूर या दोन जिल्हयात आलेल्या महापुरांमुळे हजारो कुटुंबांचे संसार उध्वदस्त झाले त्याचबरोबर या जिल्हयातील वाचनालयेही उध्वदस्त झाली. त्यातच सांगली येथील नगरवाचनालयाचे यंदाचे शतकमहोत्सवी वर्ष होते. या ग्रंथालयांमधील पुस्तके पाण्यात बुडाल्याने मसाप, शाहुपुरी शाखेच्यावतीने पुस्तकआधार देण्यात येणार आहे. प्रत्येकाच्या जीवनात पुस्तकांचे अनन्यसाधारण महत्व असते. अनेक वर्षे दोन्ही जिल्हयातील वाचनाची भूक मागवणा-या पुस्तकांची जागा नव्याको-या पुस्तकांनी घ्यावी यासाठी मसाप शाहुपुरी शाखेतर्फे पुस्तकमदत देण्याचे ठरवले आणि त्यानुसार जिल्हयातील दानशूरांना आवाहन केले होते, त्याला उत्स्फूर्त प्रतिसाद मिळाला. जनता सहकारी बँक कर्मचारी संघ, सातारा जिल्हा सहकारी पतसंस्था फेडरेशन यांनी 550 पुस्तके, पद्माकर पाठकजी यांनी 76 पुस्तके, डॉ. उमेश करंबळेकर यांनी 67 पुस्तके, श्रीरामकृष्ण सेवा मंडळाच्यावतीने 218 पुस्तके, गणपतराव साळुंखे यांनी 50 पुस्तके, संगमनगर येथील गायकवाड यांनी 106 पुस्तके अशी एकूण 1 लाख 36 हजार 756 रुपयांची दर्जेदार 1 हजार 67 पुस्तके जमा झाली आहेत. या दानशूरांचे मसाप, शाहुपुरी शाखेने आभार मानले आहेत. साहित्यक्षेत्राबरोबरच सामाजिक क्षेत्रातही ही शाखा अग्रेसर असून यापूर्वी शाखेने डॉ. प्रकाश आमटे आणि मंदाकिनी आमटे यांच्या कार्यासाठी अडीच लाख रुपये, डॉ. कोल्हे दाम्पत्याच्या सामजिक कार्यास 1 लाख 28 हजार रुपये तसेच आत्महत्याग्रस्त शेतक-यांच्या कुटुंबांना मदत केली आहे. ही दर्जेदार पुस्तके लवकरच या दोन जिल्हयातील वाचनालयांना प्रदान करण्यात येणार असल्याचेही मसाप, शाहुपुरी शाखेचे अध्यक्ष विनोद कुलकर्णी यांनी सांगितले.