सातारा : जिल्हा रुग्णालयातील आयसोलेशन वॉर्डमध्ये कार्यरत असणार्‍या परिचारिकेचा (नर्स) कराड येथील कृष्णा वैद्यकीय महाविद्यालयात उपचारादरम्यान आज सकाळी मृत्यू झाला. दरम्यान हा मृत्यू मेंदूला आलेल्या सूजेमुळे झाल्याची माहिती रुग्णालयीन सूत्रांनी दिली आहे.

याबाबत माहिती अशी की, सातारा येथील क्रांतिसिंह नाना पाटील शासकीय सर्वसाधारण रुग्णालयात कोरोना आयसोलेशन वॉर्डमध्ये कार्यरत असणार्‍या ज्योती राक्षे (वय 42) या परिचारिकेला कोरोना अनुमानित म्हणून कराड येथील कृष्णा वैद्यकीय महाविद्यालयात दाखल केले होते. दरम्यान, तिने कोरोना संसर्गावर उपायकारक असणारी हायड्रॉक्सिक्लोरीक्विन या गोळीचे सेवन केल्याचे सांगण्यात येत आहे. परंतू त्यास रुग्णालय प्रशासनाने दुजोरा दिलेला नाही. तिच्या मेंदूला सूज आल्याने तिचा मृत्यू झाल्याचे प्राथमिक माहितीनुसार सांगितले जात आहे. कालच संबंधित परिचारिकेचा कोरोना अहवाल निगेटिव्ह आला होता. यापूर्वी ज्योती राक्षे औंध, पुणे येथील शासकीय सर्वसाधारण रुग्णालयात कार्यरत होत्या. गेल्याचवर्षी त्यांची बदली सातार्‍यातील क्रांतिसिंह नाना पाटील शासकीय सर्वसाधारण रुग्णालयात झाली होती. दरम्यान, त्यांच्या मूळ गावी त्यांच्यावर अंत्यसंस्कार करण्यात येणार आहेत.

परिचारिकेच्या संदर्भातील ‘ती’ अफवाच!

सातार्‍यातील शासकीय रुग्णालयातील परिचारिकेचा मृत्यू कोरोनामुळे झाला असल्याची अफवा आज सकाळपासूनच सोशल मीडियावर फिरत होती. मात्र, संबंधित परिचारिकेचा मृत्यू मेंदूशी निगडीत आजारामुळे झाल्याचे रुग्णालयीन प्रशासनाने आज दुपारी जाहीर केले असले तरी जिल्हा प्रशासनातील इतर कोणत्याही जबाबदार अधिकार्‍याने खात्रीशीर माहिती न दिल्याने या मृत्यूसंदर्भात सस्पेन्स वाढलेला आहे. कोरोनाच्या पार्श्‍वभूमीवर जिल्हा प्रशासनातील बिनीचे अधिकारी प्रसारमाध्यमांना माहिती देताना एकमेकांकडे बोट करीत असल्यामुळे जिल्ह्यातील जनतेपर्यंत खरी माहिती पोहोचविण्यात माध्यमांना अडचणी येत आहेत.