सातारा : धनगरवाडी, ता‌. खंडाळा येथे सोमवारी रात्री उशिरा किरकोळ कारणावरून झालेल्या हाणामारीत तेथीलच मयूर शिवतारे ( वय २९) याचा खून झाला असून या घटनेत रवी मोटे, योगेश मोटे यांच्या डोक्यात वार झाल्याने ते गंभीर जखमी झाले आहेत. मयूर शिवतारे यांच्या खून प्रकरणी पोलिसांनी पंचायत समितीचे सभापती मकरंद उर्फ मारुती मोटे यांच्यासह चौघांना ताब्यात घेतले आहे.

धनगरवाडी येथील मोटे व शिवतारे यांच्यामध्ये गेल्या काही दिवसांपासून किरकोळ वाद सुरू असल्याची चर्चा सुरू आहे. त्यातूनच यापूर्वी त्यांच्यामध्ये वादाचा घटना घडल्या होत्या. सोमवारी रात्री ९ वाजण्याच्या सुमारास अनिकेत मोटे यास मयुर शिवतारे काही साथीदारांसह तू शिवीगाळ का केली याची विचारणा करण्यासाठी मोटेवस्ती तेथे गेला असता त्याठिकाणी जोरदार वादावादी होऊन तुंबळ हाणामारी झाली. त्यामध्ये मयूर शिवतारेसह रवी मोटे, योगेश मोटे हे तिघे गंभीर जखमी झाले. मयूर शिवतारे यास शिरवळ येथील एका खासगी रुग्णालयात दाखल केले असता त्याचा उपचारादरम्यान मृत्यू झाला. मयूर शिवतारे खून प्रकरणी पोलीस आणि पंचायत समितीचे सभापती मकरंद उर्फ मारुती मोटे यांच्यासह चौघांना ताब्यात घेतले आहे.

घटनास्थळी जिल्हा पोलीस अधीक्षक तेजस्वी सातपुते, अप्पर पोलीस अधीक्षक धीरज पाटील, विभागीय पोलीस अधिकारी तानाजी बर्डे यांनी भेट दिली आहे. शिरवळ पोलीस ठाण्यात दोन्ही गटांनी परस्परविरोधी तक्रारी दाखल केल्या आहेत.