सध्या उन्हाळ्याचे दिवस सुरु झाले आहेत. जागोजागी ऊसाच्या रसाच्या गाड्या या आवर्जून दिसू लागल्या आहेत. त्यांच्या भोवती गर्दी होऊ लागलेली आहे. ऊसाचा रस हा उन्हाळ्यामध्ये पिण्यास चांगलाच असतो. पण या दिवसामध्ये ऊसाच्या रसामुळे बाधा झाल्याने अनेक रुग्णही रुग्णालयात येतात. याचा अर्थ असा नाही कि ऊसाचा रस पिऊ नये, पण ऊसाचा रस उन्हाळ्यात पितांना काही साध्या गोष्टी जरूर कराव्यात.

१) शक्यतो आपल्याकडे असलेल्या स्वच्छ पाण्याचे बाटलीने ऊसाचा रस काढण्याआधी ऊसाचे मशीन धुवून घ्यावे.

२) ऊसाच्या रसामुळे जास्त बाधा ही, रसामुळे नव्हे तर त्यासाठी वापरला जाणारा बर्फ असतो त्यामुळे होते. कारण हा बर्फ बऱ्याचदा दुषित पाण्यातून बनवलेला व ऊसाच्या रसाच्या गाडीवाल्यांनी कुठून तरी विकत आणलेला निकृष्ट बर्फ असतो. त्यामुळे शक्यतो ऊसाचा रस घेतांना हा बर्फ न टाकता रस घ्यावा किंवा घरचा स्वतः च्या फ्रीज मधला, फ्रेश बर्फ वापरावा.

३) शक्य झाल्यास आपल्या स्वतःच्या भांड्यामध्येच ऊसाचा रस काढून आणावा. ऊसाच्या रसवंती वर किवा गाड्यावर बनवून ठेवलेला रस कधीही घेऊ नये. कारण, या रसामध्ये अर्ध्या तासाच्या वर ठेवलयास जंतू निर्माण झालेले असतात. त्यामुळे रस घेतांना फ्रेश रस काढून देण्याचा आग्रह धरावा. ऊसाच्या रसवंतीवाल्याची रस गाळण्याची गाळणी पण जंतुसंसर्गाचे कारण असू शकते. म्हणून ही गाळणी स्वतःची वापरावी किंवा अतिस्वच्छ धुवून घ्यावी.

४) ऊसाच्या रसामध्ये पाणी न टाकता तो रस घ्यावा घरी आणल्यावरही ऊसाचा रस फ्रेश प्यावा किंवा फ्रीज मध्ये ठेवावा.

५) ऊसाचा रस काढून घेतांना ऊस तपासून घ्यावा हा ऊस जर पिवळा हिरवा असेल तर तो चांगला असतो, लाल, काळा किंवा किडलेला असेल तर तो चांगला नसतो त्यामुळे बाधा होऊ शकते.

६) ऊसाच्या रसाचा आस्वाद घेतांना या गोष्टी पाळल्या तर तुम्हा कोणालाच आम्हा डॉक्टरांकडे येण्याची गरज पडणार नाही.

- डॉ. अमोल अन्नदाते