महाबळेश्‍वर : कोरोनाच्या पार्श्‍वभूमीवर काल मुख्यमंत्री उद्धव ठाकरे यांनी संचार व जमावबंदीचे आदेश दिले होते. तसेच जिल्हा प्रशासनाने काल रात्रीपासूनच त्याची अंमलबजावणी सुरु केली आहे. असे असताना आज सकाळी संचार व जमावबंदीचे आदेश असतानाही काही लोक बाहेर पडले होते. परंतू विनाकारण फिरणार्‍या अशा लोकांवर महाबळेश्‍वर पोलिसांनी चांगलाच दंडुक्याचा प्रसाद दिला. दरम्यान, आज सुमारे 30 मिनिटे महाबळेश्‍वरमध्ये पावसानेही हजेरी लावली.

महाराष्ट्राचे नंदनवन असलेल्या गिरीस्थान महाबळेश्‍वरमध्येही कोरोना संसर्गाच्या पार्श्‍वभूमीवर जिल्हा प्रशासनाने मोठ्या प्रमाणावर खबरदारी घेतली आहे. परवाच जिल्हाधिकार्‍यांनी महाबळेश्‍वर व पाचगणीमध्ये फार्म हाऊस तसेच हॉटेल्समध्ये वास्तव्यास असलेल्या परजिल्ह्यातील व्यक्तींनी तत्काळ महाबळेश्‍वर सोडण्याचे आदेश दिले होते. त्यामुळे पोलिसांनी काल दुपारपर्यंतच महाबळेश्‍वर व पाचगणीच्या हद्दीबाहेर परजिल्ह्यातील तसेच परराज्यातील लोकांना काढले होते. काल संध्याकाळी संचार व जमावबंदीचे आदेश पारित झाल्यानंतर आज सकाळीच पोलिसांनी रस्त्यांवर तसेच बाजारात विनाकारण फिरणार्‍यांना लाठ्या-काठ्यांचा प्रसाद दिला. मात्र ही कारवाई सुरु असतानाच दुपारी पावसाने सुमारे तीस मिनिटे जोरदार हजेरी लावली. दरम्यान, या अवकाळी पावसाने मात्र महाबळेश्‍वरकरांची दाणादाण उडवली. या पावसामुळे कोरोनाचा संसर्ग वाढू शकतो. त्यामुळे लोकांनी आपापल्या घराबाहेर पडू नये, असे आवाहन महाबळेश्‍वरमधील सामाजिक कार्यकर्त्यांनी केले आहे.