खंडाळा : खंडाळा तालुक्यातील पारगाव याठिकाणी असणाऱ्या स्मशानभूमीजवळ असणाऱ्या एका पडीक शेतामध्ये अवैधरित्या साठा केलेला डांबराचा साठा खंडाळा पोलीसांनी मोठ्या शिताफीने जप्त केला आहे.

दरम्यान, खंडाळा पोलीसांच्या धडक कारवाईनंतर अवैध डांबर साठवणुकी करणारा मुख्य आरोपी फरार झाला असून खंडाळा पोलीस त्याचा शोध घेत आहे. या घटनेमुळे खंडाळा तालुक्यात खळबळ उडाली आहे.

याबाबतची खंडाळा पोलीसांनी दिलेली माहिती अशी कि, पारगाव ता.खंडाळा येथील स्मशानभूमीजवळ असणाऱ्या एका पडीक शेतामध्ये चोरीचा डांबराचा साथ असल्याची माहिती खंडाळा पोलीस स्टेशनचे सहाय्यक पोलीस निरीक्षक हनुमंत गायकवाड यांना मिळाली. त्यानुसार सहाय्यक पोलीस निरीक्षक हनुमंत गायकवाड यांच्या नेतृत्वाखाली पोलीस हवालदार गिरीश भोईटे, संजय धुमाळ , प्रशांत धुमाळ, तुषार कुंभार, संजय थोरवे , होमगार्ड धायगुडे व जिल्हा विशेष शाखेचे पोलीस हवालदार श्रीधर शेलार यांनी संबंधित ठिकाणी सापळा रचला असता त्याठिकाणी दादा मुकिंदा गायकवाड रा.खंडाळा यांच्या मालकीच्या पडीक शेतामध्ये झाडाझुडपांच्या आडोश्याला लोखंडी बॅरल व आसपासच्या परिसरात डांबर पडल्याचे निदर्शनास आले.

दरम्यान, संबंधित डांबराचा अवैध साठा हा खंडाळा येथील सनी उर्फ गुरुदयाल कुलबतसिंग छपरी याने केला असल्याचे खंडाळा पोलीसांच्या प्राथमिक तपासामध्ये निदर्शनास आले. यावेळी खंडाळा पोलीसांनी २ लाख ८८ हजार रुपये किमतीचे ३६ निळ्या रंगाचे डांबराचे बॅरल ,१ हजार ५०० रुपये किमतीचे ३ मोकळे लोखंडी बॅरल , नरसाळे, असा २ लाख ८९ हजार ६३० रुपयांचा मुद्देमाल जप्त केला आहे.दरम्यान, खंडाळा पोलीसांची कारवाईची चाहूल लागताच सनी उर्फ गुरुदयाल छपरी हा फरार झाला आहे. खंडाळा पोलीसांनी वर्तविलेल्या प्राथमिक अंदाजानुसार संबंधित डांबराचा साथ चोरीचा असन्याची शक्यता आहे. त्यादृष्टीने खंडाळा पोलीस तपास करीत आहे.या घटनेची फिर्याद पोलीस हवालदार प्रशांत धुमाळ यांनी शिरवळ पोलीस स्टेशनला दिली असून अधिक तपास सहाय्यक पोलीस निरीक्षक हनुमंत गायकवाड यांच्या मार्गदर्शनाखाली पोलीस हवालदार एन.बी.नलावडे हे करीत आहे.